Мику Моском колыштеш

Мо тугай радио - Мику але нимат ок пале. Тиде сомыл дене шогылтшо мастар талиҥга гай шем настам пырдыж пудаш сакышат, воштырым ушкедылаш тӱҥале. Кенета шытырт-шотырт лие да айдеме йӱк туге яндарын йоҥгалте. Лачак ойлымыжым Мику умылен ыш керт - татарла кутыра.

- Мо, малай, тунаре ӧрынат, умшатат почылтын, - воштылеш радиомастар. - Сайын йоҥга вет?

Мику, сай маншыла, вуйжым тарватыш.

- Ынде эр ӱжара гыч тӱҥалын пелйӱд марте Моском, Ӱпым колышт шинчен кертат. Молан вара тынаре ӧрынат? Тиде вет радио!

- А кузе тушечын еҥ кутыра? - Мику пеш умылен налнеже.

- «Кузе-кузе...» Ужат вет воштырым. Воштыр мучко толешат, кутыра.

Мику чотрак веле ӧрӧ: тиде чӱчӱ чыным ойла але шоям лӱлеш?..

Шке пашажым шуктен, радиомастар вес суртыш лектын кайыш.

Шем талиҥга гыч пеш шергылтарат: кутырат-кутырат да гармоньымат шупшылыт, муралтенат колтат.

Пӧртысӧ сомылжым катыкемдымек, Ведаси тӱгӧ кайыш. Вольыклан пуаш, очыни. Мику шкетын кодо. Радио гыч йоҥгалтме тудлан путырак сӧралын чучеш. Колышт шогыш-шогышат, олымбак тӧршталтен, шем талиҥгам пырдыж гыч мучыштарен волтыш. Ӱстембак шекланен пыштыме годым шоналтыш: «Йырже кагаз велыс». Кӱзым руалтыш, кошар нерже дене тышеч-тушеч торалтыш - комдыш лектын возо, но нимогай еҥат уке. Кӧргыштӧ лачак вичкыж воштырым пӱтырыман паҥга гай наста-влакым пижыктыме. Паҥга-влакымат рончен радамлен оптыш - садак нигӧ уке. «Кушто вара кутырышо еҥже?» - Мику радиомастар чӱчӱ ондалымыжлан шортын колташат ямде.

Пӧртӧнчылнӧ йолйӱк шоктыш. Ава пурен шогале. Ӱстембалан рончен оптымо радиом ужын, кид гыч ведражат камвозо.

- Ой, юмыжат, мом ыштылынат?! Ынде пытаренатыс, укеш луктынатыс, калтак! Мый оксам пыштен налын толашем, а тый... Ой, юмыжа-ат, юмыжат, могай икшыве шочынат? Шалатылашак веле тале улат! - ава кенета кидшым шаралтен савырналтыш. - Вашкерак мастаржым кычал кондыман, кӧн пӧртыштыжӧ гын?

Радиомастар манмышт  район гыч толшо. Марий еҥ, Мику дене марла мутланыш. Мӧҥгыжӧ кудал шуктен огыл гын, ава конда ыле да...

Уке, каен шуктен огыл улмаш. Вашке ава ден пырля толын пурышт.

- Ончал ынде, шольым, эргым мом ыштен оптен. Мӧҥгеш чумыраш ала лиеш, ала уке?

Мастар чыла уло-укежым терген ончалят, верышкыже погаш тӱҥале.

- Мом вара тыште кычальыч, шоляш? - шкеже Микум чоян ончен шыргыжеш.

Тидын марте лӱдын, шып шогышо Мику, чӱчӱн йомартле чурийжым ужын, кӧргыжлан луш лиймым шиже.

- Шке ойлышдас, воштыр мучко толешат, кутыра.

- Кӧ толешат?..

- Еҥ...

- А-а. Еҥжым ончалнет ыле, ужат? Хе-хе-хе? Еҥже, шоляш, Ӱпыштӧ, я Москошто шинча. Шинча да кутыра, а ме тудым колыштына. Раш?

- Раш огыл, - Мику ӱскыртын торешлана. - Тугай тораште шинча гын, кузе ме колына?

- Э-э, брат, радамлен ойлем гынат, тый але от умыло. Кугурак классыш кошташ тӱҥалат, радио нерген тӱҥге-вожге пален налат. Уло тугай физика манме предмет - тыланет чыла рашемден пуа.

«Тынар шуко вучыман», - келгын шӱлалтыш Мику.

Радио ятыр пайдам пуыш. Рушла, татарла тунемаш йӧн лие. Кугурак лийме семын кумда тӱняшке почылтшо окнашке савырныш. Рвезын шӱмеш поснак радио гыч йоҥгалтше татар, пошкырт муро-влак иланышт. Ныжыл да весела я чонеш логалше ойган семышт дене шке кундем, тусо калык дек шӱмым ӱмырешлан сымыстарышт.