Все новости

Олыкышто

Кеҥеж. Июль тылзе. Шудым солымо жап. Икече Мытрият олыкым ончен савырныш. «Эрла паша деч вара шудым солыкташ кӱлеш. Олык кумда, шудо шуко», - шоналтыш семынже.

Л. Шавалиеван фотожо.
Л. Шавалиеван фотожо.

Эрлашыжым кас велеш Мытрий, тракторист дене ойласен келшен, олыкыш тарваныш. Шудым содор гына соленат пыштышт. Мӧҥгӧ пӧртылмек, оза трактористым сийлыш да акшым тӱлыш. 

Рушарнян Мытрий, ватыжым, акажым да эше кок рвезым пеленже машинаш шынден, шудо погаш наҥгайыш. Автомашина почешышт пурак гына койын кодо. 

Игече шокшо. Кӱшнӧ каваште кайык-влак мурат. Мотор пӱртӱслан куанен, нуно шудым савырышт, вара чыке-влакыш чумырышт. Ик жап гыч ямле олыкеш каналташ шинчыч, тамле чайым подыльыч. 

- Ик копнажым машина орваш кышкена, мӧҥгеш яра огына кае, а молыжым поген кодена, - каласыш оза. Молыштат Мытрий дене келшышт.

 Ик пагыт гыч нунын деке «Жигули» толын чарныш. Машина гыч палыдыме пӧръеҥ ден ватыже лектын шогальыч да татарла саламлалтыч.

- Те молан мыйын олыкым солышда? - шыдын пелештыш пӧръеҥ.

- Мый ынде кокымшо ий тыште шудым солем, - вашештыш Мытрий.

- Кок ий ончыч тиде олык мыйын ыле, - кычкыра саде еҥет да Мытрий ваштареш ӧргалаш тӧчышӧ тага гай шогылтеш. 

Мытрий, изи капан гынат, шыдыже ситышашлык, шкенжым обижаяш ок пу. Нуно коктын пижедылаш тӱҥальыч. Толшо пӧръеҥын ватыже телефонжым лукто да «Милицийыш йыҥгыртем» манын каласыш. Мытрийын ватыж ден акаже ӧрын шогат, мом ышташат огыт пале. 

- Утарыза, мом ончен шогеда? - кычкырале Мытрийын акаже шудым погаш толшо рвезе-влаклан. 

Ик рвезыже кидше гыч шорвондыжым кудалтыш да корем йымак ошкыльо, весыже лӱдмыж дене ялышкыла куржо. Тиде пагытыште Мытрий вашпижше пӧръеҥым перен колтыш - тудыжо мландыш шуҥгалте. 

- Уф, алла, тышан вуем йомдарем ала мо, - шке йылмыж дене пелешткала. Шудышто почаҥын, пыкше кынел шогале гынат, уэш Мытрий дек миен пиже. 

Ты пагытыште Мытрийын изажат шудым погаш полшаш толын шуо. Машина гыч лектын шогалмеке, аптыранен колтыш, шольо дене палыдыме пӧръеҥ пуйто сабантуйышто тагам налшаш верч пижедылыт. Иза нуным пыкше лыпландарыш. 

- Мый олыкым мӧҥгеш пӧртылташ йодам. Тыршымыланда акшым окса дене тӱлем, - сӧрвален йодо пӧръеҥ. 

Мытрийын чонешыже витышат, оксам налаш келшыш. Тиде пагытыште милиций машинат толын шуо, татар вате йыҥгыртен шуктен докан. Нунышт Мытрийын изажын палымышт лийыч. Тудыжланат тау, шудым мӧҥгеш ястараш ыш перне, мӧҥгышт ик копна шудо дене пӧртыльыч. «Илышыште тыгеат лиеш улмаш», - мане Мытрий да кугун шӱлалтыш. 

Автор:И. САЙПУШЕВА. Ӱлыл Такия ял, Краснокам район.
Читайте нас: