Палыдыме емыж

Шуко еҥже лимон могай лиймымат пален огыл. Ялыште эн ончыч олмапум, эҥыжвондым, шоптырвондым Алексей Масаев шынден. Олмажым йодшо-влакланат пуэден. Варарак Пекий Дмитриевынат икмыняр олмапужо ыле. Ынде ялыште кажне еҥын сад-пакчаштыже олмапум, иргам, крыжовникым, шоптырвондым ужаш лиеш. Мый лимон нерген ик оҥайым каласкалынем.

Ӱткӱстӧ ялыште илыше Окалче акай кугу ешеш шочын-кушкын. Изинек пашалан тунемше ӱдыр школ деч вара фермыште пашам ышташ тӱҥалын. Акаже-влак тӱрлӧ вере шаланеныт, иктыже Чепаш ялыш марлан лектын. 

Ик гана ӱдыр Изыкай акаж дек Чепашыш унала каен. Караидель селаште кевытыш пуренат, яшлыкыште «сар олмам» ужын да кок килограммымак налын. Тудо пагытыште автобус коштдымылан кӧра Чепашыш йолын ошкылын. 

Ик вере каналташ шичмек, сумкаж гыч «олмажым» луктын да тамлен  пурлын… Кочо «олма» шинчавӱдымат луктын, мландыш шӱвалшашлык гына лийын. 

Ӱдыр, кучылтмо оксажым чаманен, корно мучко ойгырен каен. Тиде «олма» дене мом ышташат ӧрын, но Чепашыш намиен шуктен. А Изыкай акаже лимоным намийымыжлан куанен веле, шуко налмыжлан гына ӧрын. Мӱндырч толшо унам лимонан чай дене сийлен. Лимонан чай Окалчыланат келшен. Чайым подылмек, чонжат лыпланен. Мӧҥгӧ пӧртылшашыж годым ик килограммжым акажлан коден, весыжым пеленже наҥгаен да шочшыжо-влаклан шалатен, лимон дене чайым йӱаш туныктен. 

Окалче акайна кызытат лимонан чайым йӱаш йӧрата. Икымше гана «сар олмам» кочмыж нерген воштыл-воштыл каласкала.