Мо сайрак?

Изи ӱдыр йодышташ йӧратен. 

- Мо сайрак, - йодын тудо аваж деч, - олма але груша? Роза але гладиолус? Вӱд але ситро? Мече але курчак?

Аваже эре вашешташ тыршен гынат, семынже ӧрын. Чынжымак, мо сайрак: мече але курчак? Роза але гладиолус? Ойырен каласаш лиеш мо?

- Авай, мо сайрак: йомак але муро? - йодын икана ӱдыр.

- Тый теве шоналте, мо сайрак: кече але кава? Тиде йодышлан вашештет гын, мыят каласем, мо сайрак: йомак але муро, - манын аваже.

Ӱдыр ятыр жап шонен, вашмутым кычалын. Тудо кавашке да волгыдо кечыш ончен. Мо сайрак: кече але кава - каласен кертын огыл. Нуно ойыраш лийдымын мотор койыныт.

Тиддеч вара ӱдыр мо сайрак манын йодын огыл. «Йомак мо дене келшен? Мо дене муро сай?» - йодын тудо. А аваже тудлан уло кумылын вашештен.