Торт

Ӱдыр ден аваже, веселан кутырен, пельменьым ямдылышт. Аваже газыш вӱдым шолташ шындыш. 

Тиде жапыште кудывечыште йӱк-йӱан шоктыш, пий опталтыш. Оля содор гына окнаш миен ончале. Кудывечыште палыдыме еҥ-влак шогат. Ик рвезын кидыштыже ал пеледышан чевер торт койылалтыш. Ачажат уна-влак ваштареш толын шогале. Чылан пӧртыш пурышт да саламлалтыч. 

- Уна-влакым кондышым, - ыштале ача. 

Оля ден аваже тыманмеш ӱстелыш сийым погышт, пельменят кӱӧ. Рвезе кондымо тортшым ӱстелыш шындыш. Чылан ӱстел йыр  погынен шинчыч. Ӱдырым марлан налаш толмышт нерген мутым луктыч. 

- Мый кудывечыш лектын пурем, - каласыш ӱдыр да нунын ваштареш илыше пошкудыш ошкыльо. Ик жап Оля йолташ ӱдыржӧ дене шинчыш да Катялан чыла каласкалыш. 

- Шылын куржшо оръеҥ улат мо? - ыштале пошкудо ӱдыр. 

- Пошкудо ялысе таҥемланат марлан лекташ шым келшат, вес районыш садак ом кай, - руале Оля.

Шагат утла ӱдыр окна воктене уна-влакын мӧҥгеш кайымыштым вучен шинчыш. Качымарият, йомдарен, Олям кычал пурыш, но садак кӧндарен ыш керт.

Уна-влак кайымеке, ӱдыр ласкан шӱлалтыш да Катям торт дене чайым йӱаш ӱжӧ.

Мӧҥгеш пурымеке, Олян шинчажлан ӱстелыште торт ыш перне. Холодильникым ончале, туштат уке. «Авай, саде чевер торт кушто?» - йодо ӱдыр. 

«Тортым рвезе мӧҥгеш наҥгайыш», - вашештыш ава. «Кондымо сийым мӧҥгеш наҥгайыман мо?» - шоналтыш ӱдыр.

…Ӱдыр рвезылан марлан лекташ огеш кӧнӧ гын, тортым тамлыман огыл. Тудым пелен мӧҥгеш наҥгайыман. Нунын ялыште тыгай йӱла улмаш. 

Жап ятыр эртен гынат, Олян кызытат саде тортым кочмыжо шуын колта. 

Кевытлаште шуко тӱрлӧ тортым ужалат, но ала-молан рвезын тортшо ушыж гыч огешак лек…