Февраль

Кумда урвалтыжла кокла гыч

Ош погыжым йырваш шава.

Тыгай вот тудын тура койыш:

Тӱня пӧрдеш, лӱшка, лойга.

Коклан, пий семын      

                           йыҥысалын,

Вӱта шеҥгелне йӱклана.

То, пире гае урмыжалын,

Пасушто ош кӱтӱм покта.

А южгунам январь гыч Йӱштӧ

Кундемыш унала пура.

Да жаплан веле… тудын вуйжо

Ош лум тӱтанеш аҥырга.

Чӱчка февраль тек, юарлалын,

Вет тудын жапше кӱчык пеш.

У канде шовырым чиялын,

Вашке гыч Ӱярня толеш.