АВА ЭН ШЕРГЕ МЫЛАННА

Коҥга тул                        

Коҥга тул йӱла оҥайын,

Чӱчкалтен да кушталтен,

Шыжыктен сескемжым талын,

Кажне лукым ырыктен.

Тулын тӱсшӧ шуко-шуко,

Ужар, канде, кӱренат.

Тудым ончен, шижде кодым,

Шолын лектын чаемат.

Йӱла тулжо, вийым налын,

Коҥгам шокшо ден темен,

Ялт йомакысе тулгайык

Мотор шулдыржым шарен.

Ешарен пуртем пу ӧлтым

Кугынракын, лек тыят,

Моклакам шолем мый нӧлпым,

Толжо мотор чурият.

Овартен руашым кӱкшын, 

Ырыктен тулеш салмам, 

Кергалтен тувырын шокшым,

Кӱэштеш мелнам авам.

Мелна кышыл ӱстембалне,

А воктенже шӧр-ӱмбал.

- Ит юватыл тый тембалне,

Шокшыж годым тодыл нал.

Йӧратен кочкам мый сийым,

Ӱян шӧреш тушкалтен,

Подылам кокланже чайым,

Тамле мӱйым лугалтен.

Коҥга тулын юзо вийже

Ешым иктыш чумыра,

Эре тудо шокшо лийже,

Ынже йӱкшӧ сурт куан.

Коҥга тулжо - ю шонанпыл,

Коҥга тулжо - ялт ава.

Тудын шокшо кӧргӧ туллан

Вуйым кажныже сава.