Все новости
Сылнымут аланыште
23 Июнь 2022, 12:21

Поланвондо

Умарий ял мучаште ик поланвондо кушкеш. Тудо кажне ийын июнь тӱҥалтыште пеледеш. Ялыште илыше-влак тудым огыт логал, поланлан верч укшыжым огыт тодышт. Ик ӱдыр веле тышке чӱчкыдын толын коштеда. Тудо, чон вургыжын, поланвондо пеледмым вуча. Теве тачат ял мучашке вашкыш. Толын ончале, поланвондо эше пеледын огыл. Полан пеледме годым ола гыч каникуллан акаже толшаш.

Редакцийын архивше гыч налме фото.
Фото:Редакцийын архивше гыч налме фото.

Настя шукертсек тиде ялыште ила, акажым пеш шуэн ужеш. Таче ӱдыр мӧҥгӧ ыш вашке, поланвондо воктеке шинчын, аважым шарналтыш.

…Настян аваже кужу жап больницыште кийыш, вара тудым мӧҥгыжӧ колтышт. Изи йоча, ойгырен, эре аважын тӧрланымыжым вучыш. Ик кастене куваваже тольо, коҥгаш олтыш, мелнам кӱэште. «Таче мыйын нимат ок коршто, эрла мончаш пурем», - каласыш аваже. Ала-молан куваваже шортын колтыш, а Настя куанен малаш возо. А эрдене тудым кугу ойго вучен - аваже колен. 

Ачаже вес ватым кондымек, йоча-влаклан шыгыр лие. Ончыч акажым поктен колтышт, тудо Вася изаж деке илаш кайыш. Изи Настят ачажлан илаш мешайыш. Ачаж ден ватыже, кас сайын йочам пӧртеш тӱкылен коден, унала коштыч. 

Изи ӱдыр ик идалык чытенак илыш. Чийыме вургемже изиэш кодо, чияш уке лие. Труд урокышто туныктышо тудлан тувырым урген чиктыш. 

Куваваже пачаш-пачаш эре иктымак ойлен: «Уныкам, тыште илен от керт, кокат деке кай». Кеҥежым ӱдыр кокаж деке унала кайыш, тушанак илаш кодо. Мыняр жап кокаж дене илыш, ачаж могырч тудым иктат: ни шольыжо-влак, ни шӱжарже - ышт шарналте. Настя, изиш кугеммек, шочмо ялышкыже куваваж деке мийыш. Куваваже мешакыш кӱпчыкым, портышкемым пыштен колтыш. Машина шагал коштмылан кӧра ӱдырлан Пӱрымучаш гыч Умарий марте йолын ошкылаш вереште. 

Ачаже кужаш ыш иле, ик чевер кеҥеж кечын колен колтыш. Настя ачажым пытартыш корныш ужаташ мийыш. Школышто тыршен тунеме. Тулык йочалан кажне ийын чияшыже школ мом-гынат пуэн шогыш…

Шонкален шинчымыжым агытан муро йӱк кӱрльӧ. Настя мӧҥгыжӧ ошкыльо. Эрлашыжым эр-эрденак адак ял мучашке куржо. А тушто поланвондо чевер ӱдыр гай пелед шогалын! Ӱдыр моткоч куаныш, шыргыжал колтыш, мурен-мурен, мӧҥгыжӧ куржо. 

Чынак, эрлашыжым кечывал деч вара акаже толын шуо. Кузе тунам ӱдыр куаныш! Кертеш гын, тетла акажым нигушкат ок колто ыле.

Автор:Д. АПЛЕКАЕВА. Караидель район.
Читайте нас: