Тауштымо мут

А таче тылат тауштен муралтем.

Йӧратыме, лишыл Моркем, моторем.

Нӧлпер гыч йоҥга 

                        ныжыл шӱшпык йӱкет,

Чаманышыч мыйым, пиалым сӧрет.

Мый тыйын вӱдетым пырля налынам.

Мый тыйын киндетым тамлен иленам.

Эҥертыше лийын йӧратым ешем.

Аралтышым шижын, пеледе чонем.

Кугорно воктечын эрта ийготем.

Чыла ончылнем: шочмо ял, уремем.

Яндар памашетын сескемже лийнем.

Шӱмбел родем-шамыч, 

                               вуемым савем.

* * *

Шочмо вер! Шӱм-чонемын 

                          эн йомартле муро. 

Кайык лийын, чоҥештен толам.

Пушеҥгет лиям, лиям эн писе ур гай,

Модо пырче лийын, тыйым ончалам.

Илыш толкын ИЛЫШЕМ вашталтыш,

Кодымо суртпече мочоло вучен.

Пӱтырналтышшудо 

                          йолгорнем авалтыш,

Но садак ыш сеҥе ошкылем кучен.

Шӱргӧ мучко пунымо вӱд йогын -

Кочо мут чӱчалтыш, 

                       шӱлалтен ом керт.

Ойырен тыге гын пӱрымашын корно,

Арымшудо лупшо чонысо ӧпкем.

Памаш вӱд пундашын яклака шаргӱла

Яндарешт шичмешке шӱалтем чонем.

Кеч-могай тораште иле шӱшмӧ ӱйла,

Шочмо мланде кӱдынь ылыжеш оҥем.

Маныда: пиалан тудо шочын

Маныда: пиалан тудо шочын -

Ковыран урем дене эрта.

Ошкылеш ма вонча корно гочын -

Ош пеледыш гай ошо, шыма.

Маныда: шӱдырат огеш йӧрӧ,

Волгыжтӱр тудым веле вуча.

Ӱжара кӧрана, шыпак ӧрын,

Чевер тӱс ал чурийым вӱчка.

Маныда: кумылжат кече гае,

Шовыржат кап-кылланже келша.

Кыжганен, койдарен ида кае,

Илышлан тиде - уто кыша.

Маныда: пиалан тудо шочын,

Маныда: шӱм-кылжат кӱсле гай.

Курымашлыкыш лӱддымын вончыш.

Марий ӱдыр, тыматле тугай…

* * *

Кызытат тиде вийым ом пале, Йӧратен, шӱм-чонемже шолеш.

А садерыште шӱшпык ок мале,

Олмапу пеледеш мӱй тамеш.

Кечыйол шымата чуриемым,

Ӱппунем лӱҥгалта мардеж ден.

Колышташ чонеш вочшо у семым

Шӱшпык муро тӱняш чоҥештем.

Ала-кӧн чон шижмашым кычалын

Ошкылам, нигӧ деч вожылде.

Ныжыл тӱрвӧ гыч тамым ом нал гын,

Мый ом керт товатат, мурыде.

А садерыште шӱшпык ок мале.

Сай йолташ таче тушко толеш.

Садланак дыр ты вийым ом пале,

Йӧратен, шӱм-чонемже шолеш.

Ит мондо ыле, чонем

Кас рӱмбалге шымата ялемым,

Ӱжара ал ӱпшым шаралта йырваш.

Рошт! Памаш вӱд пуйто 

                               кайыш шелын,

Корнышко тарваныш, 

                      йоргыктен тораш.

Ош пеледыш олыкем покшелне

Лай мардеж ден эркын тарванен.

Кудыр йолгорнем ӱмбаке велын,

Пиалемым тӱрлыш волгалтен.

Мый тыгай кастене сай 

                                   йолташым муым,

Кидышкем висвисым кучыктен тунам.

Да вучалын касым, йӧршын уым-уым,

Чонем дене пуйто кайык лийынам.

Ший памашын вӱдым, 

                               ош пеледышемым,

Мокталтен мурем да тыгерак шонем:

«Эх, мотор кастене, 

                          поро шӱм лишеммым

Тый ит мондо ыле трукышто, чонем».

* * *

Кава ден мланде ушнымаште

Чеверласа йӱд ден пасу.

Тора йолгорно-влак коклаште

Йомдаренам улмаш асум.

Мый кодым, торгавуйым ужын,

Шым курж поктен мардеж почеш

Ала-кунам вашлийме южым.

Тачат чонем ишналтше пеш.

Кожер тӱкна кава копашке,

Турнян чапаште шочмо вер.

Мый тыш кодам, нигуш ом вашке.

Чыла сита, чыла чевер.

Канем, кием тӧшак ӱмбалне,

Уржа пушан мландем шупшал.

Мален колтем гынат, ом кылме,

Ош пыл левед пышта ӧндал.

Кава ден мланде ушнымаште

Эр кечым ото вашлиеш.

Ила ласкалык ош тӱняште.

Ида орлане, сай лиеш!