Кокымшо гана эҥыремым вӱд ӱмбаке шуышымат, пеш эскерем. Шукат ыш эрте, эше ик колым шӱдырен луктым, ты ганажым мӱктӧ логале. Тамле шӱрым шолтена манын, тудымат ведраш колтышым.
Кумшо гана эҥыремым вӱдышкӧ кудалтышым. Кол чӱҥгаш тӱҥалмым чон вургыжын вучем. Вӱд ӱмбалне колкоэм мӧҥгеш-оньыш кошташ тӱҥале. Эҥыремым кок кидем дене кучен шупшыльым. Пеш мотор шӧртньӧ тӱсан кол шинчам йымыктарыш. Пеш куанышым, шӧртньӧ колым писын ведрашкем пыштен, мӧҥгӧ куржаш тарванышым. Но кенета кол сӧрвалаш тӱҥале:
- Мыйым ерыш колто, мый тыланет школышто тунемашет полшем.
- Кузе вара мыланем тунеммаште полшен кертат? - йодым мый.
- Тений шыжым визымше классыш тунемаш пурет, а шошым, май тылзыште, лат-икымше классым тунем пытарет, - темла шӧртньӧ кол.
- Школ гыч тыге вашке тунем лекмем ок шу, - ойлем, - теве мемнан ял гыч школыш кошташ вик корно да Тӧргым эҥер гоч кӱвар лиеш гын, ме школыш куанен коштына ыле. Ала, шӧртньӧ колем, корно ышташ да кӱвар чоҥаш полшен кертат? Ме тыйым ӱмырешат огына мондо ыле…
- Йӧра, полшем! - ӱшандарен каласыш шӧртньӧ кол да, кидем гыч мунчалтен волен, вӱдыш пурен йомо.
Ынде ме шӧртньӧ колын кӱварым чоҥаш да корным ышташ полшымыжым вучен илена. Ала чынак полша?