Музикан

«Амалжым кычалат гын, тӱҥыш ончал», - каласен Козьма Прутков. Молан тиде ойым шарналтышым, каласенат ом керт. Такше возаш тӱҥалмемын амалжат «Зри в корень» ойсавыртыш денак кылдалтын.

Ойлышаш шомакем музикан нерген лиеш. Тудо шке юзо йӱкшӧ дене мыняр чоным пыл помышыш нӧлталын? Мыняр еҥым весела семже дене нойымеш куштыктен, мыняр еҥын чонжым луштарен? Шоктымо семым колыштын, ала-кушко торашке, эртыше пиалан самырык жапыш, чоҥештет. Палыме семым колын, южгунам шинчавӱдат лектеш. Уста еҥын кидыштыже музикан юзо вияныш савырна!

А йоча тудлан кузе куана?! «Валерийын шокташ тунеммыжлан йывыртен, музиканым шоктыктен, урем мучко издер дене шӱдырен коштам ыле», - шарналта Миша йолташыже. Мыйын ик ият пелаш уныкамат, мутланен ок мошто гынат, музикан дек вӱден намия да шке семынже шокташ йодеш. Кнопкыжо-влакым темдыштеш, йӱкшым колыштын куана. Умбакырак торлат, шоктымемым чарнем, а тудо ӱмбакем тӱткын ончалеш да йолжо дене топ-топ тошкалеш: «Шокто!» Адак, шупшкеден, семым лукташ тӧчен шинчем. А тудо йӱкшым колыштеш. Но, шонем, йӱкшым колыштмаш - тиде тӱҥалтыш веле. Варарак вуйыштет вес йодышат шочеш: «А тиде йӱкшӧ кушеч лектеш? Музикан кӧргыштӧ мо уло?»

Молан тыгай йодыш ушыжым пудыраташ тӱҥалеш, маныда? А музиканым шоктымаш да амалжым кычалмаш мемнан ешын вӱрышкыжак шыҥен. Авам ден ачам коктынат тальянкым, гармоньым шоктат ыле. Изамланат музикан сем келшен, сылне йӱк памаш кушеч шырчен лекмым палымыже шуын.

Ик кечын ача-аван пашаш кайымышт шеҥгеч ачамын музиканжым шупшкедаш толашен шинчылтын. Ӧрмыж дене савыркаленат, рӱчкаленат ончен. «Ӧрат веле: от шупшыл - йӱкат ок лек. Кӧргыштыжӧ мо уло вара? Мо йӱкым пуа? Почын ончаш кӱлеш», - шонкален дыр семынже.

Кӱзӧ дене почаш шотшо ситен огыл, векат. Ачанан изипила дене оҥам пӱчмыжым шарналтенат, музиканым, оралтыш луктын, мландыш шынден да изипилам нумал толын. Шӱжаржылан ик велым, модаш толшо ӱдырлан вес велым кучыктен, музикан кӧрыкым пӱчкаш тӱҥалын. Тыгай ӱзгарым икымше гана кидыш кучышо еҥлан пӱчкаш куштылго, шонеда? Изипилаже куэмеш пижедылын, тышке-тушко, ӧрдыжкӧ каен. Тыршен-тыршен, пареҥге пакчам катманлен лекше гай пӱжалтын, пашажым кузат-тугат мучашлен. Музикан кок велыш шаланен возын. Но мо тыгай - кӧргыштыжӧ нимат укес? Йодышыжлан вашмутым муын огыл. Ятыр жап ӧрын, вуйжым удырен шогылтын. Вара кенета «Ачам тиде пашалан ок мокталте вет» манын шоналтенат, музиканжым, пырля ушен, верышкыже шынден коден.

Ачана, осал ыле гынат, йоча ӱмбак нигунам кидым нӧлталын огыл. Тудын чыла шонымашыжым, кумылжым ончалтышыштыжак «лудынна». Изамын «осал пашажын» амалжым умылымек, йӱк кушеч да кузе лекмым умыландарен. А гармоньжым ачалаш пуэн. Теве тылат «Зри в корень».

«Уныкамлан изи музиканым налын пуаш кӱлеш», - шоналтышым мый.

Изображение Gerhard G. с сайта Pixabay

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».