Пӱнчер мылам - чонан симфоний,
Мочол йӱк сылнын йоҥгалтеш!
А кӧ мура? Кычалше ом лий -
Колам, да кумыл лӱҥгалтеш…
Оркестр шокта. Ужын отыл?
Ок кой пун пад(ы)раш лӱс коклаште -
Шыргыжеш йол йымач кӱдыроҥгыр…
Пӱртӱс помыжалтме ты татым,
Ты семым от кол нигуштат.
О шошо! Пуэт вий-куатым -
Кӱдыратле, ал погымо жап!
Пӱнчер мылам - чонан симфоний,
Мочол йӱк сылнын йоҥгалтеш!
А кӧ мура? Кычалше ом лий,
Колам, да кумыл лӱҥгалтеш…