Шӱдыржӧ эше виянрак волгалтеш

Шукерте огыл Мишкан район библиотекын кугу залыштыже ямле вашлиймаш эртыш. Кумдан палыме поэт, композитор да яндар йӱкан мурызына Светлана Салиеван 70 ияш чапле лӱмгечыжым палемдышна.

Калык шуко погынен ыле. Район администраций вуйлатышын алмаштышыже Л.Г. Александрова юбилярым пеш куандарыше мут дене саламлыш. Тиде поро шомакыш район ветеран-влакым вуйлатыше Ю.Г. Балахнинат ушныш. Паша ветеран Р.К. Ялаева почеламут сборник нерген кӱчыкын радамлен каласкалыш. Инна шӱжарже, Андриян веҥыже да Люся шешкышт чон гыч лекше мутым каласышт.

Светлана - путырак поро, эпле, ыҥгайле да мотор ӱдырамаш. Тиде кечын чевер деч чевер пеледыш-влак юбилярын тӱсшым эше утларак сылнештарышт. Поро еҥ порылыкым шкеж деке шупшеш, маныт. Пайремыш РДК-н хоржо да «Мишкан сем», марий историй да тӱвыра рӱдерын «МуроЭм», Нерге ялын «Ӱжара» мурышо ансамбльышт, палыме мурызо-влак Светлана Каншаева, Алексей Ибулаев, поэт Дина Александрова чумыргеныт ыле. Нуно авторын мурыжо-влакым путырак ямлын да веселан йоҥгалтарышт. Пӧръеҥ трио сылне марий сем-влак дене куандарыш. А мо акан гимн гай йоҥгалтше «О, Мишкан» мурыжо?! «Пиалан жап эртен муро гае» мурын семже мыйын шинчалукемат вӱдыжтарыш.

Кидыштем С. Салиеван «Мутланал мый денем, шӱдырем» у почеламут сборникше. Тиде поэтын кокымшо пашаже. Вич ий ончыч мемнам «Лий пеленем, пиалем» почеламут аршашыж дене палымым ыштен ыле. 2019 ийыште ветеран-влаклан эртарыме «Время творить» проектын финалистше лийын, ятыр почеламутшым савыктыме сборникышкышт пуртеныт.

У сборникыш поэтын чон шондыкыштыжо изин-изин погымо эн чапле сылнымут корнылажым чумырымо. Лудаш путырак кумылло да куштылго. Автор тӱрлӧ темым тарвата: шочмо вер-шӧр, идалыкын сӧрал ныл жапше, илышыште аван Юмо гай улмыжо, тукымвож, еш, икшыве-влак, чын йӧратымаш, ӱдырамашын пиалже да молат.

Светлана Ивановнан шкешотан почеламут корнылаже келге философий шӱлышан улыт. Тудо шуко сӧрастарыме йӧным кучылтеш - ял памашыже «ший йӱкан», «йӱштылтем капем яндар южеш мый», «мардеж у корныш погыналын», «канде кас шып иеш вӱд ӱмбаке», «касвелеш ош пургыж койышланыш», «таче теле шортеш, шошылан ӧпкелен», «кас ӱжара ал шовычшым рӱза», «кеҥеж касым лӱҥгалтыш рӱпшен». Нуно шонымашыжым эше утларак почын пуаш полшат.

Сережа уныкажлан, Геннадий Изибаев туларжылан, Кадрия тулачыжлан, «Мишкан сем» ансамбльын тале мурызыжо-влак Зинаида Айгишевалан да Елена Шумаевалан лӱмлымӧ корнылаже книгалан посна ямым пуртат.

Поэт йочан психологийжым сайын пала, моштен кучылтеш да нуным «Кече», «Шемеч», «Агытан», «Киса», «Комбо», «Шогертен», «Пырыс», «Лудо» почеламут-влак дене куандара.

Аваштым саламлаш Станислав эргыже (Мишкан РДК-ште ышта), Надя шешкыже (марий да руш йылмылам туныкта), Сережа уныкаже, Октябрьский ола гыч Денис эргыже (Белебей олаште искусство школым вуйлата), Регина шешкыже, Ваня да Аня уныкаже-влак толыныт ыле. Эрге-влак да Сережа, гитарым шоктен, аваштлан сылне муро-влакым пӧлеклышт. Регина шешкыже Андрей Эшпайын семжым пианино дене пешак сылнын йоҥгалтарыш.

Светлана Ивановнам саламлаш шукын пеледыш дене толыныт. Коло ныл ий ожно туныктен лукмо 4-ше класс лӱм дене Василий Пашкин йӧратыме туныктышыжлан эн мотор букетым кучыктыш.

Тиде ямле пайремым эртараш Т.А. Кондогинан вуйлатыме библиотекын чыла пашаеҥже-влак чот тыршеныт. Касым Олеся Зайнетдинова ден Ильвира Айбердина моштен вӱдышт.

2015 ийыште Светлана Салиеван лӱмжым Мишкан районын литератур картышкыже пуртеныт ыле, а ынде тудын шӱдыржӧ эше мӱндыркырак да виянрак волгалташ тӱҥале.

Авторын колтымо фото-влак.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».