21 март - Поэзийын тӱнямбал кечыже

Ава кид

Адак сирень шыман тӱкалтыш

Лӧза копаж ден окнашкем.

А ушыштем - тура тошкалтыш,

Авам ончале шинчашкем.

Кӱзем. Шӱмем кӱлтка лекшашла,

Кизамым тудын дек шуем…

Вет илыш курыкыш кӱзашак

Ава ӱнарым пӧлеклен!

Садлан чолган мый ӱмыр мучко

Эртем. Шӱртнем гын, кынелам.

Ок чаре нимогае шучко,

Мый илыш кӱкшытым налам.

Садак шинчам авай воктеке,

Копашкыже таем вуем…

Тыгак ушнен вӱд мланде дене,

Да Мланде, Кече - ик ушем.

Пиалым ӱжын моштыман

Пиалым ужын моштыман

Изи куаныште, пашаште,

Эр шошо кече вашлиймаште.

Вашеш пиал дек ошкылман,

Но шкетын огыл, коктын огыл,

А калык кумыл дене шолын

Да калык чон дене йӱлен,

Пиал ден илышлан тӱлен.

Пиалым ӱжын моштыман.

Огеш тол тудо його чоныш.

Теҥгече уш гына вет чоҥыш

Эрлан у кечыжым. Ончал -

Сай кумыл чынышке вонча.

Аклен йолташым, таҥже лийын,

Элнан куатыштыже ийын,

Пырля шортман да воштылман.

Мардеж пасум рӱпша шыман,

Заводын тӱньык вуйыш шӱдыр,

Сакен ший йолжым, шинче йӱдым.

Вес шӱдыр Мланде гыч вашка

Сандалык лончыш, тылзышкат -

Чылаштыжат куаным ужын,

Элетын ошкыл дене куржын,

Пиалым ӱжын моштыман.

Альбертина ИВАНОВА. Йошкар-Ола.

Кугезе сем

Изинек чоным савырыш Кӧкыш ялем,

Тыште родо-шочшем, пошкудем, кумылем…

Мый шижам, кеч шукертак тораште илем:

Шочмо-кушмо кундем - пуйто ныжылге сем.

Кажнын шке пӱрымаш. Мыйымат наҥгаен

Саман шулдыр торашке, чонем авалтен.

Кидтуп ден шинчавӱдшым шыпак ниялтен,

Урем лукышто кодо шоген аваем.

Шӱлыкаҥе тунам, шоҥ парчажым кышкен,

Шӱшпык йӱк ден йоҥгалтше ужар садерем.

Чеверласыш шыман шергакан шочшыж ден

Шочмо-кушмо кундем, ямлын вургыжмо сем.

Сем пыжашым оптен шӱмешем курымлан,

Йоҥга тудо лыжган, утыр шкеж дек ӱжеш.

Шӱдылен сем кокла гыч эн шерге мылам -

Порсын кыл гай кышам коден рвезе чонеш.

Йоген вӱд, памаш вӱд шагал огыл шырчен,

Вургемлажым пӱртӱс ий еда вашталтен.

Кушкын, нӧлтын ялем - лишыл шочмо кундем,

Да вучен шуктен огыл… лыжга аваем.

Омо гае эрталшым уэш шарналтем,

Ныжыл сем шочмо суртым ок керт мондыктен…

Тайналтен, йошкар пызле окнам пералта,

А тоштемше капка кочырик муралта...

Игорь ГУБАЕВ. Нефтекамск ола.

***

О, шошо, кумылем ит волто,

Вӱдшор почеш йоген йомаш.

Пеледше шонымем ит колто,

Эреак ӱжшӧ ош каваш.

Илаш сӧрал, моторым шижын,

Шӱлаш ласка яндар южеш.

Вет чон, кеч волгыжтӱрыш пижын,

Вес чоным мӱндырнат ужеш.

Эр шошын волгыдо шижмаш ден

Илаш ыле эше арня.

Ох, шошо, тыйын тыршымаш ден

Марий кундем - чевер тӱня.

Зоя ДУДИНА. Санкт-Петербург ола.