Пошкудыштына ила Лизук

Пошкудыштем изи гына ӱдыр - Лизук, Лизавета, Елизавета - ила. Молан изи ӱдырын тынар лӱмжӧ уло, маныда? Тӱрлӧ годым тӱрлын лӱмдымыланна кӧра дыр. Мыланна тудо Лизук. Да йӧратена ме тудым! Шкежат мемнам ача-аваж деч вара эн лишыл еҥжылан шотла докан, садлан эрдене помыжалтешат, мемнан деке пурен шуэш. «Пырысда кушто вара?» - вигак йодылда. Но шинчаж дене пырысигым огеш кычал, а, паледа, кушко онча? Кухньысо шкаф велыш. Тушто тудын йӧратыме «Рафаэлло» кампет коробкаже коеш. Тудо пала, тушто кампетке уло гын, тудым садак сийлат. Кампеткыжым кочкеш да, «Пырысигыдам налын каем, йӧра» манын, лектын ошкылеш. Вес гана адак тыге пырысигылан пура.

Н. Фурсован сӱретше.

Ик кечын кечывал лишанрак Лизаветана адак пурен шуо. Тӱсшӧ ойган коеш, теве веле кок изи шинчаж гыч шинчавӱд йырген вола, шонет.

- Мо лие, Лизукем? - тупшым вӱчкалтен, вуйжым ниялтен, ӧндал йодым.

- Павай, а мо нуно мыйым эре командоватлат? Молан мыйым огыт колышт? Мыйынат командоватлымем шуэш, - ойган йӱк дене пелештышат, пеленем пызныш. - Мый тетла нунын дек модаш ом мий.

Адак лыпландараш кампеткым шуялтышым. Кочкын пытарышат, уэш, пырысигым налын, чыла ойгыжым монден, модаш лектын куржо.

Вес гана «Кокай, лиеш мо, мый йолташем-влакым пуртем, лӱҥгалтышыштыда лӱҥгалтена?» малдыш. Йӧратен ончышо шинчан, порын, ласкан йодшо изи падырашлан тореш каласаш лиеш мо? Мемнан Елизаветана йолташ ӱдыржӧ-влак коклаште, нунышт кугурак улыт гынат, авторитетым куча. Пурат, почела лӱҥгалтат. А воктенышт мотор кужу пунан изи Пончик пий пӧрдеш. Тудыжымат ончалмет еда йӧратымет шуэш. Мутат уке, чыланат йӧратынешт. Пончикшат ниялтымылан куана веле.

Лизукна тудым кампетке дене сийлыме нерген йолташыже-влакланат ойлен улмаш. «Кокай, а Ира «Нигунам «Рафаэллом» кочкын омыл» манеш. Уло гын, тудланат пуэда?» - пелашемын шинчашкыже ончен ойла. Кузе от лук? Ирам веле огыл, чылаштым сийлет.

Ну, пӱсӧ лывырге ушан улеш мемнан Лизукна! Южгунам кокажлан кӧстенечымат нумал пура: я йошкар мӧрым, я пасу гыч поген толмо ужар пурсам. Кокажын порылыкшылан порын вашешта.

Икана кастене рӱмбалгаш тӱҥалмек, мемнан, кугурак-влакын, шашлыкым кӱктен шогымына годым, капкам шолт шоктыктен, Лизукна пурен шуо.

- Шашлыкым ыштеда мо? - воктекна лишеме.

- А тый, кушеч пален, толын шуыч?

- Пушыж дене кычал муым, - шыман пелештыш.

Мутат уке, эн тамле пӱчкышыжым адак Лизуклан кучыктышна.

- Мий, ачат ден аватымат ӱжын тол, - темлышна.

- Уке. Тек нуно, мый гаем шашлык пушым шижын, шке толыт.

Ме рӱж воштыл колтышна да ача-аважым ӱжын кондышна.

А икана азап лийын кайыш. Лизукнам мӱкш пӱшкылын. Пӱшкылынжак огыл, ӱпешыже пижын да мызлаш тӱҥалын. Тудо, уло уремым шергылтарен, «Авай!» манын кычкырале да пӧртышкыжӧ нюслен куржын колтыш.

Пашам пытарымек, «Лизукем кузе гын?» манын пурышым. Аваж пелен пызнен шинчын, изишак шинчавӱдшат коеш. «Лизук, ала мӱкш пӱшкыльӧ?» шыман йодмылан «Да, тендан мӱкшда пӱшкыльӧ, теве тышечын!» тӱкен ончыктыш. Ӧрмаш, пуалын огыл.

- Тый вет кампеткым йӧратет. Теве тылат кампет, - малдышым.

Лизукемын шинча шыр лие, кумылжо нӧлталалте.

- Палет, павай, пӱшкылмӧ верже ышат пуал. Мый мӱкш деч ом лӱд, - изишак лыпланыш, коеш.

- Да, - манам, - мӱкш дене вашлиймеш от лӱд. Чай йӱаш пуро. Пырысигет вуча.

Ну, кузе тиде акылан чукайым от йӧрате? «А тыйын лӱмет кузе?» йодышлан раш вашешта: «Елизавета Эриковна!» Молодец мемнан Лизукна!

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».