Марий йылмем - мыйын вием

Шочмо йылме - мемнан тӱҥ туныктышына. Тудын полшымо дене ме йырым-йырысе пӱртӱс дене палыме лийына, калыкнан йӱлажым, ойпогыжым, илышым палаш, Шочмо Элнам аклаш тунемына. Кӧ шке шочмо марий йылмыжым тунемеш, пагала, тудлан тудо руш да моло йот йылмым сайын тунемашат полша.

Мыйым шочмо йылмылан изинек кувавам шӱмаҥден. Молан кувавам, а авам огыл, маныда? Изиэм годым пеленем утларакше кувавам лиеден. А авам, эрден эрак кынелын, фермыш пашаш каен, мӧҥгына кастене гына пӧртылын. Мый авамым кечывалым гына ужынам. Кувавам мыйым малташ пыштенат, марла мурым, южгунам такмакым муралтен. Книгаште возыдымо тӱрлӧ оҥай йомакым, марий калыкын йӱла пайремже-влак нерген каласкален. Ковам дене пырля марий концерт-влакыш коштынна. Тудо таче мартеат ял калык дене пырля мура-кушта, спектакльыште модеш.

Ме кеч-могай мӱндыр олаш родо-шочшына деке унала миена гынат, шочмо йылмына дене мутланена. Тидлан мыйым Казахстаныште илыше Жанна кокамат кумылаҥден шога. Тудо ятыр ий тора кундемыште ила гынат, шке икшывыже-влакын чонышкат шочмо йылмын ямжым шыҥдараш тырша. Тыге гына, тукым гыч тукымыш куснен, марий йылмына аралалт кодеш, шонем.

Шочмо йылмына поян. Мыняр сылне почеламутым, мурым, ойлымашым тудо шочыктен! Тудын нерген шуко писатель ден поэт-влак возат.

Ош тӱняште мыняр уло калык,
Кажне калыкын шкенжын чурий.
Чот вожеш чурияҥше саскалак
Алым налын тӱняште марий. (С. Николаев.)

Тыгак М. Майн, Я. Ялкайн, С. Чавайн, В. Изилянова шочмо марий йылмынам, калыкнам моктен возат.

Мыят кӱчык ойлымаш ден почеламут-влакым возгалем, такмакым погем. «Шыже» ойлымашемым «Чолман» да «Ямде лий» газетлаште савыктымылан пеш куаненам ыле. Ынде сылнын лудшо-влакын конкурсыштым вучем.

Авам ден кувавам мыланем марла тувырым, ончылсакышым, ӱштым, согам ыштен пуэныт. Тӱрлӧ кундем гыч толшо артист-влакын концертышкышт, спектакльышкышт мыят, шӱжарем, авам, кувавам, кокам-влакат эреак марла чиен мияш тыршена. Тыге, шке калык йӱланам аклен, чоннам куандарена.

«Тыршымаште - вий», - ойла мыланна авам. Тыршымаште да эше илышым йӧратымаште, шочмо йылмым, калыкым, тудын йӱлажым, ойпогыжым аралымаште, аклымаште - эн кугу вий!