Поян чондай

Илыме вернаже чапле,

Кöранаш сита йотлан,

Кеч Моско мемнам ок жапле, -

Ончыкта парня коклам.

Ялемжат, таҥастараш гын,

Огыл «Шурале» Кырлай,

Но палем мый иктым рашын:

Тол - чонет уэм тырла!

Чын, «якар Чарлак» малдалыт,

А вес семынже - пижон.

Йöратен дыр тысе калык

Ковыртатылаш - виш оҥ.

Чак пошкудына - Аргы́ш,

«Киш вуй» - тыгайрак шем

лÿмышт.

Кö ызга, манам «Эй, кыш-ш,

Игылтме йöн ынде кÿпныш!»

Ужыдас, уке азап

Эн улакыште да ялышт:

Ни начальстве, ни оза, -

Тиде огыл мо пиалже?

Танып гоч гына - Маняк,

Шекланем изиш молан дыр.

Пÿшкыл шаярат «маньяк!»

Туштым шарныкта куп мланде.

Пураялышке пуралтын,

Шер теммеш йÿам пуратым:

Полто гыч - ай, пеш разга,

Шолтышышт, раш, юзо гай!

Тек ок вучо Керемет

Сöрвален «Улат родемак!»

Аракам лöкен шындем гын,

Йырже - лÿкö коремет.

Лучо шкем кучен пондаш гыч,

(Илыш огыл мо йомак?)

Виче гоч шуэм, пундаш кеч

Шучкын эскера: «Йомат!»

Лапкашор, Анач да Чаке,

Маринжат - тату кундем…

Но тышан лакем ом чакне, -

Мÿндыркö адак шунем.

Чу, Йошкар Октябрь! Пале,

Революцийын йокма.

Колынам мый, тысе калык -

Кутко еш, чапшат йоҥга.

А эше… ила коклаштышт

Верысе граф Лев Толстой.

Ончыкта газетын лаштык,

Байтуков Филипп - ой-ой!

Трук шарналтышым тыгодым

Ик оҥайым - чыным ялт:

Ожнырак кувай - у родо

Унала вашкен, ойлат.

Дöртыльö вокзал - чылт табор!

Лукто «шийым» шÿдырен:

- Мыланем Октябр, Октябр,

Тушто веҥым, ÿдырем. –

Корно кÿшкö, корно ÿлык…

Йымыжа - автобус сем!

Йомо тÿрлö шоныш - шÿлык, -

Лый-й нералтыш шоҥгыеҥ.

Икте-кокыт але визыт -

Эртыш гын мыняр шагат?

Тпру-у! - чарналтыш «ожо» -

писе,

Волыш куваят, ага.

Умылен ок керт шол йöршын,

Пуйто йöрыш кечыжат:

Ончыштеш тыш-тушко öрын, -

Йомдарен теҥгем, ужат?

Манметла, лектешак öртшö,

«Куш логальым?» - шонкала.

Поҥгыла йырваш -

кÿ пöрт-влак…

Вес тÿня тыгай ала?

- Омешем конча мо тиде?

Чал карта, колем, вай-вай! -

Рудыш да уэшын пиде

Ал вуйшовычшым кувай.

Пиалешыже лишеме

Погонан ик йыгыт рыҥ.

Йодышт нале мо-кузежым…

- Бу Октябрьский шäхäры 1, -

Мане пыртак шыргыжалын.

- Бабка, ялгышкансыз шул*. -

Икманаш, мöҥгеш ужатышт.

- Зур рäхмäт, улым, сау бул!** -

Лийын ты оҥайсыр пöрык,

Сай, кунам мучаш - айват.

Кызыт кувайна-влак öрын

Огыт аҥыргыл, товат.

«Сотикын» тесте нар «полдыш» -

Модыш веле нунылан.

Мокмыр уныкан, мырла, -

Адакат кö дечын полыш?

Интернет денат эсогыл

Улыт ынде поро тос.

Ажгынле - саманын йогын?

Тÿрыс, ит лий товартош!

Кö манеш, «МАРИЙ пыта»,

Пеш кугун шÿвал ÿмбакше.

Шулдырым шаралте да

Угыч ончыко, умбаке.

Васола, Павасола,

Йывангасолажат уло…

Кай пурлашке, кай шолаш -

Огынал ме мыскынь-тулык!

Кошарташ муам мо шотым

Сусыртыде шÿм-чондам?

Кажне ялын койыш-шоктыш

Шке сынан - поян чондай!