Уныка

Кызыт ял калык черет дене кӱта, тиде пашам эн нелылан шотла. Кӱтӱчӧ кӱтышаш кечыжым шотлен луктешат, ямдылалташ тӱҥалеш: солам пуна, йолташлан еҥым кычалеш. Кызытсе жапыште еҥымат муаш куштылго огыл. Солам кучен кертшыже пелне пашам ыштен коштеш, пӧртылшыжӧ шкенжын сомылжым ворандарен шукташ тырша. Кечын кӱтӱш коштшо вольык пеш ок шалане, но кеҥежым кече кужу, иктаж шым шагатлан лукман да кече шичшаш годым веле пуртыман.

Июль тылзыште Петр кугызаланат кӱтӱ кӱташ черет толын шуэш. Кугу эргыже ден шешкыже у пӧртым шуктынешт, жапышт уке, садлан изи эргыж дене кӱташ мутланен келшат.

Кече шокшо, Петр кугызалан нояшыже сита. Кастене пӧртылешат, теҥгылыште канен шинча, кӱварыште уныкаже нушкын коштеш. Изи йоча кечеш кӱын чевергыше кочажым чаманен ончалеш. Ватыже ӱстелыш кочкаш пога. Петр кугыза ӱстелыш ончалешат, кугун шӱлалтен пелешта: «Эх, «дару» лиеш гын…» Уныкаже кочаже ӱмбак ончалеш да шкаф деке нушкын мия. Шкаф йымач литрат пелан шиша-влакым луктын кышкаш тӱҥалеш. Иктым луктеш, ончалеш да ӧрдыжкӧ кораҥда. Икмыняр толашымек, ик шиша пундаште вӱдым ужешат, кочаж деке шӱдырен наҥгая. Коча ден кувава изи йочан шкаф воктен толашымыжым ӧрын ончен шинчат. Коча изи уныкаж деч шишам налешат, рӱзалтен онча. Лач нойымылан ситышашлык «эм» кодын. Петр кугыза куанен колта.

Пӧрт нӧлтымӧ деч вара кодшо яра ате-влакым шешкыже шкаф йымак поген шынден улмаш. Тидым изи ӱдыр ужын. Тыге, кӱварыште нушкын коштшо йоча кочажын ойгыжым умылен налын да, чаманен, полшаш шонен.

Кызыт Петр кугызан уныкаже кугу лийын, школ деч вара Уфаште тунемеш. Коча ден куваваже уныкаштлан окса дене полшен шогат. Ӱдырат нуным ок мондо, каникул годым сомылыштым ворандараш полышкала.