Колызо Кырля коча

Ик сылне шошо кечын Кырля - Кирилл кочай, кол кучымо ӱзгаржым погалтен, Кугу ерыш тарвана. Кызыт, шемгол модмо пагытыште, суртышто мален киет гын, саде тамле кол деч посна кодат. Кырля коча, теле гоч погымо пластик шиша-влакым ваш-ваш пидыштын, ик еҥым сеҥыше чапле куштылго пушым ыштен. Кужу телым кол кучымо ӱзгарымат шкак пидеш, пазарыште наледен ок кошт.

Теве коча Кугу ерыш миен шуэш. Чыла вере кайык муралта. Мландымбалне ужар шудо але ок кой, но пушеҥге-влак вес тӱсым налыныт. Коча, оҥ тич южым шӱлалтен, шке пашажлан пижеш. Теҥгече кас пыштыме вапшыжым нӧлталешат, тушто лыҥ колым ужеш!

Кенета шараҥге воктеч пӧръеҥ йӱк шокта. Ончалеш гын, ӱпшат копыж шогалеш. «Рыбнадзор» манын возымо вургемым чийыше, кидеш кугу бинокльым кучышо пӧръеҥым ужылалта. Туддек лишемеш, но лӱдмыжым ончыкташ ок тырше. Саде еҥет коча ӱмбак туран ончалын йодеш: «Тый кушто пашам ыштет але ыштенат?» Моланжым коча умыла, могай «йолашым» чийымыжым шарна, конешне. Пошкудо рвезе, ончычсо полиций пашаеҥ, сурт сомылетлан йӧра манын, икмыняр йолашым пуэн улмаш. «Мый огыл, веҥым - полиций пашаеҥ», - каласат, вуйым сака. «Кочай, таче огына наказатле, колетым поген, мӧҥгет ошкыл, - порын пелешта рыбнадзор. - Но тетла мемнан кидыш ит логал! Кучалтат гын, кугу оксам тӱлашет перна».

Ынде шке шонен ончыза: ала йолаш, ала шукчо-пуйырышо полшеныт. Тылеч вара Кырля ер воктеке шуэн коштеш. Мия гынат, йырым-йыр ончыштде, шекланыде, пашалан ок пиж.