Поэзий шӱлыш

Таче тӱня йырваш ошо-ошо,
Кызыт Теле пӱртӱслан оза.
Садланак тудо нерен ок шого,
Ош чияж ден чиялтен чыла.
Олыклаште пуйто ош пеледыш
Пеледалтын, мардеж ден лӱҥга.
Пасула ӱмбалне ош леведыш
Йӱштӧ деч чонаным перега.
Вот лӱшка поран, ӱштеш ош мландым,
Теле сомылжым шукташ тырша.
Вондерла коклашке темыш лумжым,
Пече воктен курыкым чоҥа.
Ончалат пасушко - пеш оҥайыс, -
Лум пӧрдем ден мардеж ӱчашат.
Пуйто ош футболкан футболист-влак
Пасу мучко ош мечым поктат.
Весела лиеш вет каныш кече,
Теле яндар юж дене шӱла.
Чие ечым, лек кожер воктеке,
Ош садерыш - телыш унала.
Келанаш гын, чараклен ош татым,
Ах, огеш лий жапым сорлыклаш.
Таче мый ом вучо чевер шошым,
Телымат кӱлешыс умылаш.

Теҥгече сур кава гыч Теле волыш,
У вургемым чийыш кундемнаже.
Мландышке шаланыш ош леведыш -
Вашлияш унажым ынде ямде.
Касвелеш ош пургыж койышланыш,
Мамык лумжым кышкыш коремлашке.
Ош теркупшым пундышлан пӧлеклыш,
Ший аршашым сакыш укшерлашке.
Шургыш вондерлаште, ӱштӧ корным,
Корныеҥым поктылын куржтале.
Уремлаште тӧрлыш у йолгорным
Да каналташ чымалте кожерлашке.
Лектым мый уремыш, яндар южыш,
Лумым келын волем арамашке.
Пеш тыршеныс игече теҥгече -
У озанлык нӧлтын ял мучаште.
А таче кече волгыдо тугае,
Кечыйол модеш нӧлпер укшлаште.
Пуйто Кече нимом ужын огыл,
Коштын шке пашаж ден пыл лоҥгаште.

С. САЛИЕВА.
Мишкан села.