Поэзий шӱлыш

Миллион-влак

Кодшо курымысо 30-шо ийлаште уста туныктышо да прозаик И. Токмурзин-Ломберский ешыж дене ик жап Краснокам район Ушмен ялыште (Тугодым Калтаса район) илен. Туштак «Миллион-влак» роман шочын.

Чап тылат, Ломберский! -

Пагыт гоч манам.

Пӱрымаш лыҥ верышке

Кышкылтын тунам.

Школышко мут колыштшо

Нӧргӧ вий вашка.

Уым акыл олыкыш

Тый вакшат, вакшат…

Йӱдымжӧ перат йымач

Нерештеш «Миллион…»

Омо шулдырат йыма,

Йомо пырдыж оҥ.

…Шкат Ушмен урем дене

(Вет Коян воктен!)

Чонышто мурем темын

Южгунам эртем.

Волемат вӱд серышке,

Трук, шонем, ужам

Вурс романым серыше

Патырнам, тазам.

Чын, сонарзе-колызо

Омыл вуй-почге.

Шордым ялт от кол кызыт,

Эҥержат пучен.

Одо вел Ломберский! -

Таче кӧ шарна?

Ынде рӱдӧ верыште

Тӱрлӧ «шаурма»…»

«Миллион-влак!» Меже гын

Уныкашт садак.

Теве тиде «емыжым»

Эл дене чак кылдат.

Мо шарнем, ялна покшелне

Пӧрт шинча акрет тӱсан.

Кумыл лончо гыч чал семла

Уло йырымак тӱза.

Шыгыррак да помыш школын,

Вашлияле йымыжан.

Йоҥгыдо йӱкнажым колышт

Йывыртен дыр пырдыжат.

Порым ыш чамане тудо

Варажат, ида те ӧр, -

Икманаш, ыш лийыс уто

«Вӱрйӱшӧ» кулакын пӧрт.

Ужатеныт шакшын лӱмдыл

Ир верлаш озам ешге.

Кызытат шонен от лӱд мо?

Куклышт, ох, тӱҥге-вожге!

Шучко омыла порволыш

Ӱйӱрма* жап шукертак.

Тошто пӧрт алят - сай полыш,

Моктыде кузе кертат?

Чоҥенжат моштен кугезе,

А вет пӱнчӧ, кож гычак.

Возын йот мландеш? Тугеже

Лийже Юмо декак чак!

Таче виш почмо омсаже

Йӧршын у ешлан гынат,

Пуйто йӱд-кечат озажым

Пӧрт вуча - эн тӱҥ унам.