Пий ден агытан

Пинеге мыйым поктат манын шоналтыш дыр, лӱдын, шеҥгек ончен кудале. Тиде пагытыште пӧрт вес могырч тыгай скорость денак агытан чывым поктен куржын улмаш. Иктылан утлаш, весылан покташ кӱлеш. Тыгай годым кӧ тӱткӧ лиеш? Кӧн оралтыштыже светофор, корнысо знак уло? Мемнан уке. Чывет пусакым куржын эртыш, а теве агытан ден пинеге пеш кугу аварийыш логальыч, тӱкнышт. Агытан нелырак, садлан пинеге шуҥгалт кайыш - икманаш, кок йолан ныл йоланым сӱмырыш. Агытан лӱдмыж дене тӧршталтен колтышат, ныл парнян йолжо дене пинеге ӱмбак кӱзен шогале. Пинеге, суртвольык улеш гынат, лӱдын йыҥысалтыш. Агытан, «Ит васаре» маншыла, пинегым, чӧгыт дене перымыла, чеслын гына чӱҥгал пуыш. Тудыжо, «Кӧ кертеш, шылза» маншыла, кузе дыр утлен, стайер гай кудалын, пий вӱташ пурен йомо. Ик пагыт гыч, вуйжым луктын, локатор гай пӧрдыктен ончале, агытаным ужат, шылын шинче.

Жап эртен гынат, кажныжын «компьютерешыже» саде случай «возалт» кодын дыр. Вашлиймышт годым, кудывече изи гынат, икте-весым километр гыч кораҥ каят. Агытан пеш кугешныл коштеш, виянрак улмыжым ончыкташ тырша. Чыве вуйжо дене эре тыге лийшаш манын шона дыр. Но пагыт шуэшат, пинеге кугу пийыш савырна.

Тугак лие. Ындыжым пий агытаным поктылеш, тудыжо куш пураш огеш пале. Йӧра, Юмо чывылан шулдырым пуэн, кашташ чоҥештен кӱзен шинчешат, ко-ко кококлен, утлышым чай маннеже. Садлан пийым йолышташ возеш. Туге гынат агытан чыве-влак дене пырля коштмыж годым монден колта дыр - пий дек лишемеш. Пиет шукертак лийшым мондашат огеш шоно, ыр-р-р ырлен, агытан ӱмбаке опташ пижеш, кержалташат тӧча.