-5 °С
Пылан
Все новости
Сылнымут аланыште
14 Сорла 2018, 18:31
Финляндийыште возымо почеламут-влак
Могай ӱшан ден еҥ ила тӱняште,
Кокланже пӱрымашлан эҥертен,
Тугай шижмашак почылтеш лӱдмаште:
Ӱшаныде, иктат ок керт илен.
Чонан айдеме тунемеш шӱм гочын,
Уш-акылым пога шижмашлан верч.
Мый таче каласем, шӱмемым почын:
Тый веле аралетыс лӱдмӧ деч.
***
Вожылеш гын кече мый дечем,
Муралтем шке семын мый тудлан.
Каласем эн поро шомакем,
Лач тыгай айдеме мый улам.
Вожылат, палемыс, шӱмбелем.
Тӱтыра гай койышем коклан...
Тый ит кучо тидым шӱм пелен,
Каласал, мый умылем чыла.
***
Илышаш айдемын шӱмжӧ
Огеш чарне нигунам.
Пӱрымаш деч ом лий лӱдшӧ,
Мый пӱртӱс йоча улам.
Шӱлыметым колышталын,
Чон ӱшан дене темеш.
Аралем шыпак пиалым
Шӱмын кӱлткымӧ семеш.
***
Ойлат, чарнаш уке амал,
Каем сандене мунчалтен.
Кӱкшӱ вержат, ойлат, шагал,
Садак нимат ок керт чартен.
Айдеме кумыл деч шога,
Кузе лияш, каяш мо куш...
А мыйын илыш - пӧрт коҥга,
Лач тый денет нигуш ок шупш.
***
Пеш шуко илышыште сулык...
Ок эмле вӱд, проста ма, юзо.
Лач тудо ылыжта шем тулым,
Ок полшо ото, черке, Юмо...
Эртен ок кай айдемым лӱмын,
Тулойып деч кодеш чон сусыр.
Лыпландарет гын мыйын шӱмым,
Лиям тылат эн чапле мужыр...
***
Чодыра пуа мо нунылан оксам?
Уло пушышт, яхтышт, кок-кум машинашт.
Але мланде финнлан утларак полша?
Лач мемнан ден тиде йӧршын ок шижалт...
Кок паша ден шкемым индырем гынат,
Пиалан улам мый мӧҥгыштем садак.
Таумутым шуко мый ойлем тылат,
Пӧртылмеке, шокшын ӧндалам адак...
Т. ТОКТАРОВА (ЯПАЕВА).
Йошкар-Ола.
Читайте нас:
© 2024 «Чолман». Республиканская общественно-политическая газета на марийском языке. Издается с 24 апреля 1991 г.
Главный редактор - Губаев Игорь Иванович.
При использовании материалов гиперссылка на сайт cholman.info обязательна.
Категория информационной продукции 12+
Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.
Мы в соцсетях:
ВКонтакте - vk.com/cholman
Telegram - https://t.me/cholmantv
Я.Дзен - https://dzen.ru/cholman
ОК - ok.ru/cholmanrb
TikTok - tiktok.com/@cholman.tv
Телефон
Телефон: 8(34783)7-07-97.
Электрон почто
Адрес
Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж.
Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».