Все новости
Сылнылык тӱняште
15 Апрель 2022, 10:58

15 апрель - Искусствын кечыже

15 апрель Искусствын тӱнямбал кечыжлан шотлалтеш. Тудым 2012 ийыште палемдаш тӱҥалыныт. Тыгай кечын кӱлешлыкше нерген ойым Искусствын тӱнямбал ассоциацийже тарватен. Молан 15 апрель? Тиде кечын 1452 ийыште кумдан палыме итальян художник, скульптор, математик Леонардо да Винчи шочын. Тидлан 500 ий утла эртен гынат, пашаже-влак тӱнямбал кӱкшытан искусствовед, ученый-влакым кызытат ӧрыктарат.

Авторын фотожо-влак.  Нефтекамск оласе чодыра тӱрым тыгай сылне сӱрет выставка сӧрастара. Тушто ArtNeftCITY изобразительный искусствын виш фестивальыштыже йоча-влакын ойыртемалтше усталык пашаштым ужаш лиеш.
Нефтекамск оласе чодыра тӱрым тыгай сылне сӱрет выставка сӧрастара. Тушто ArtNeftCITY изобразительный искусствын виш фестивальыштыже йоча-влакын ойыртемалтше усталык пашаштым ужаш лиеш. Фото:Авторын фотожо-влак.

Искусство тӱрлӧ лиеш. Искусствым кажне еҥ шке семынже умыла. Сылне муро, куштымаш, опера, балет, сӱретче-влакын творчествышт, кидмастар-влакын усталыкышт - чыла тиде искусство. Посна тӱшка семын изобразительный искусствым ойырат. Тышке живопись, графика, декоративно-прикладной искусство, скульптура, фотоискусство, граффити пурат, а кином, музыкым, хореографийым, балетым динамический искусствылан шотлыман.   

Искусствын кечыже калыклан йырысе илышыште моторлыкым ужын мошташ кӱлмӧ нерген ушештара, кызытсе искусство нерген шонкалаш тарата, эстетика шижмашыжым вияҥда - икманаш, искусство тӱня деке лишемда. Лач тыгай шонымаш денак тиде кечын эл мучко художественный выставка, конференций, музейлаште виш омса кече-влак да моло творческий мероприятийым эртарат. Тыгай кечын иктаж выставкыш, музейыш, театрыш, сӱрет галерейыш але вес тӱвыра учрежденийыш «унала» пурен лекташ йӧршынат уто огыл. Искусствын кечыж годым веле огыл, молгунамат. Кызытсе илышыште республикысе кумдан палыме музейлашкат виртуальный экскурсийыш «миен толаш» але, ялысе сурт гыч лекдеак, шкенан але пошкудо кундемысе иктаж театрыште спектакльым ончаш лиеш. Интернет да технологий-влак тидлан кумда йӧным ыштат.

Авторын фотожо-влак.
Авторын фотожо-влак.
Фото:Авторын фотожо-влак.
Автор:Людмила Шавалиева
Читайте нас: