Все новости

Баян сем почеш куштышна!

Апрель мучаште «Кушнаренковские зори» республикысе фольклор усталык фестиваль эртыш.

Ме, Йывангасола йоча коллектив, «Преемственность» номинацийыште «Ой, луй модеш» да «Никольские гуляния» кок куштымашым шындышна. Марий куштымашын эн неле элементше - тиде тывырдык. А тудым уло кумылын, чон почын кушташ шонет гын, Йывангасолаш толза, туныктена. «Одноклассники» сетьыште видеом шынденна, кӧн кумылжо уло, ончалза, кузе йоча-влак тывырдыкым уло кумылын куштат.

Южгунам пайремыштат могай-гынат экшык лийын кертеш. Мемнанат тыге лие. Куштымашым увертарышт, фонограммым оператор муын ок керт, зал вуча. Мом ышташ? А ме тыгат кертына, баян дене! Фестиваль кок кече шуйныш. Мемнан Йывангасола йоча коллектив 27-ше апрельыште да вес кечынже гала-концертыште мастарлыкшым ончыктыш. Кажне коллективлан республикысе фольклор фестивальыште лиймыштлан дипломым, а Гала-концертыште калык куштымаш искусствым арален кодымылан шергакан пӧлекым кучыктышт.

Л. АЛЫНБЕКОВА, Йывангасола тӱвыра пӧртын вуйлатышыже.

Краснокам район.
Читайте нас: