Книга уш-акылым пуа, илаш туныкта

Р.К. Ялаева - паша ветеран, кызыт сулен налме канышыште улеш, койыш-шоктышым воспитатлыме нерген 5 книган авторжо, шочмо кундемнам, еҥ-влакым шымлыме пашам уло кумылын шукта.

Чорай селасе Я. Ялкайн лӱмеш марий гимназийын тунемшыже-влак, ял калык шкеныштын землякышт дене вашлийын мутланымаште тудын «А иначе зачем на земле мы живем» у книгаж дене палыме лийыч. Тыгай йӧн мемнан книгагудын, ялсовет администрацийын да марий гимназийын туныктышыжо-влак полшымылан кӧра ышталте.

Рита Каникиевна книгам лукмо амалже, возымаште ончыктымо еҥ-влак нерген каласкалыш, савыкташ полшышо-влаклан тауштыш.

Мишкан район администраций вуйлатышын алмаштышыже Л.Г. Александрова, райрӱдыштӧ илыше поэт С. Салиева, Чорай гимназийын директоржо Г.З. Зайнитдинов да молат поро тыланымашым ойлышт, Чорай кундем талантан да творческий шӱлышан еҥ-влаклан пеш поян манын палемдышт, нунын кокла гыч иктыже - Р.К. Ялаева. Тудын книгаже-влак кушкын толшо тукымым шуарымаште кӱлешан улыт, калыкнан йӱлажым аралымаште кугу рольым модыт.

Тынбай кыдалаш школышто марий йылмым туныктышо Н.П. Минаева ончыкылык тукымым воспитатлымаште шке калык йылмым пагалымаш, Рита Каникиевнан книгаже-влак шочмо йылме да национальный культур нерген шинчымашым шараш полшымо нерген ойлыш.

Светлана Салиева Рита Каникиевналан пӧлеклыме почеламутшым лудын пуыш, книга авторын кок шочмо шӱжарже Валентина Зайнуллина Рита акаж дене пырля эртарыме ий-влак нерген каласкалыш.

Усталык вашлиймашым верысе ӱдырамаш мурышо ансамбль, СДК пашаеҥ Саара Тимиркаева, самодеятельный мурызо да шоктышо Игорь Васильев да музиканче Олег Шаймарданов сӧрастарышт. Варажым мутланымаш фойеште, оза-влакын ямдылыме марий чеслан поян ӱстел коклаште шуйныш.

Т. ТИМИРКАЕВА, Чорай ялысе библиотекын вуйлатышыже.

Снимкыште: Пайрем ӱстел коклаште.