«Марий паркым» шарналтена

Ожнырак Йошкар-Олаште илыше, вузлаште да моло вере тунемше самырык-влак кеҥеж кастене мураш-кушташ, икте-весе дене палыме лияш «Марий паркыш» (Какшан сер воктенсе Ленинский садикыш) погынат ыле. Ынде тиде вер аралалт кодын огыл, но тудын нерген иктаж-кӧн ойлымыжым кызытат колаш лиеш. Самырыкышт годым Йошкар-Олаште тунемше мемнан кундемысе ӱдыр-рвезе-влакат тугодсо эн сай жап да тусо оҥай вер-влак нерген кумылым вӱчкышӧ шарнымашым тачысе кече мартеат чоныштышт ашнат, шонем. Мутлан, Марий Элын калык писательже Юрий Галютин «Марий парк» дене кылдалтше самырык жапше нерген тыге каласкален. «Марий парк» самырык-влакым эре шке «помышышкыжо» ӱжын шоген. Мыят тушто ик ӱдыр дене палыме лийым. Вашлияш тӱҥална. Икана тувел кундемыште коштмо годым кугу йӱр оптале. Ме Икымше аптеке деке куржын колтышна да леведыш йымакыже шылын шогална. Кужаш шогышна, а йӱр ок чарне. Ӱдырлан мӧҥгыжӧ каяш тора, Медведевыште ила. Могыр сӱсаныш. Изишак ыраш манын, мый лишыл пӧртысӧ подъездыш пураш темлышым. А вара пӧрт коклаш кӱзен кайышна. Мый сур тӱсан у костюмым чиенам ыле. Пинчакым кудашын, шичшаш верыш шаралтышым. Ӧндалалт шинчен, мален колтымымат шижын огынал. Помыжалтмеке, ӱдыр пинчакем верч тургыжланаш тӱҥале: тудо туржалтын, амырген. «Нимат огыл, - лыпландарен пелештышым, - тый мыланем пинчак деч шергырак улат!»

Ӱдырым мӧҥгыжӧ ужатен колтышымат, Какшаныш пинчакым мушкаш ошкыльым. Но эрыктен шым керт, шуэн кодаш логале…»

Тунамсе жапым, «Марий паркым» шарналтен, шукерте огыл Йошкар-Олаште Марий кугыжаныш филармоний «Марипарк» вокально-хореографический спектакльым шынден. Режиссержо - Алексей Ямаев. Мурымаш-куштымаш спектакль аншлаг дене эртен, калык ончаш рӱж погынен миен. «Марий Эл» куштышо кугыжаныш ансамбль тиде премьерым апрельыште мемнан кундемышкат конда. 16 апрельыште Нефтекамск оласе Самырык-влакын тӱвыра полатыштышт мемнамат оҥай шарнымаш кас вуча. Умбакыже тудым 17 апрельыште Краснокам район Коян селаште, 18 апрельыште Мишкан район Кугу Соказаште,19 апрельыште Бирск олаште, 20 апрельыште Мишкан селаште ончыктат.

Меат лудшына-влаклан, «Марий парк» нерген шке шонымышт, шарнымашышт уло гын, самырык годсо историйыштым редакцийын электрон почтышкыжо (cholman@mail.ru) возен колташ темлена. Эн оҥайжым газетыште савыктена, а авторлан тиде спектакльыш тугок пураш Ӱжмашым (кок верлан) кучыктена.

И. ГУБАЕВ.

Снимкыште: «Марипарк» вокально-хореографический спектакль гыч куштымаш.