«Келшымаш» - моторлык да куат

Нефтекамск оласе тӱвыра илыш нерген ойлымо годым тӱрлӧ коллективын лӱмжым шарналташ лиеш. Кугурак «ийготан-влак» гыч иктыже - «Дружба» («Келшымаш») ансамбль. Тудым тӱрлӧ ийлаште Тамара Абдрахманова, Владимир Дорофеев, вараже 30 ий наре Павел Сайранов вуйлатеныт.

Кызыт «Келшымаш» Оласе тӱвыра рӱдерыште верланен. Вуйлык «сапым» Наиль Садретдиновлан ӱшанен кучыктеныт, балетмейстерлан Лариса Садретдинова тырша.

Ансамбльыште визыт гыч латкандаш ияш марте ныл куштышо тӱшка уло. Нуным чылаштым калык куштымашым йӧратымаш ушен шога. Тунемше ден студент-влак оласе тӱрлӧ микрорайон гыч (Краснокам район Музек ял гычат ик рвезе уло) арняш икмыняр гана репетицийыш коштыт.

«Келшымаш» калык куштымаш ансамбльын усталык саскажым оласе кажне гаяк мероприятийыште ужаш лиеш. Репертуарыштыже башкир, татар, удмурт, казак да моло куштымаш-влак улыт. Мутат уке, ӱдыр-рвезе-влак ятыр ий марий куштымашымат пеш мастарын куштат. Мемнан калыкын кумылжым тарватыше тыгай номерышт тачат уло. Вуйлатышын палемдымыж почеш, весымат ямдылаш тӱҥалыныт. А эше калык концертлаште «Маков цвет» ансамбль (вуйлатышыже Р. Хафизова) дене пырля ямдылыме моткоч поян содержаниян вокально-хореографический композицийым пеш шокшын вашлиеш.

Но коллективын мастарлыкше, тыршымыжын лектышыже нерген каласкалаш шотлан ок тол, шонем. Мо кузежым шке ужаш-колаш, шижаш, чон вошт колташ кӱлеш. Кумылда лиеш гын, 5 апрельыште Оласе тӱвыра рӱдерыште «Келшымашын» отчет концертшым ончен кертыда. «Тудым кызытсе жаплан келыштарыме уто эффект деч посна, но путырак поро кумыл да шӱлыш дене эртарен колтынена», - ойла ансамбльын вуйлатышыже Н. Садретдинов.

Э. АПТУЛМАНОВА.