Мотор семже эл мучко шергылтеш

Тыгай мотор пӱртӱсан селаште мемнан йӧратыме, пагалыме марий рвезе Сергей Николаевич Зайнитдинов ила. Тудо 1975 ий 11 июньышто шочын. Аваж ден ачаже, Нина Александровна да Николай Сайпушевич, ӱмыр мучко колхозышто презым онченыт, ушкал кӱтӱм кӱтеныт. Ешыште шым йочам ончен куштеныт, Сергей - кудымшо икшыве. Николай Сайпушевич Калтаса район Мераҥ ялеш шочын. Ачаже, Сайпуш, шочын инвалид, колхозышто бригадирлан ыштен. Шке кидше дене скрипкым ыштылын, сайын шоктен.

Кандаш ияш Сергейлан ачаже ик идалыкаш пашадарже дене, ешыжлан каласыде, эн шерге музиканым налын. Ту жапыште 120 теҥге кугу оксалан шотлалтын. «Кӱзгӧ ваштареш шогалын шокташ тунемаш тӧчымем годым музикан шеҥгеч вуемат огеш кой ыле. Кум тылзе гыч ковайым, авайым мурыктем ыле. Пайремлан уна-влак погыненыт, пошкудо-влак чайым йӱаш пуреныт - нунымат мурыктенам. Индешымше классыште тунеммем годым ачам кокымшо баяным налын пуыш. Клуб коллектив дене яллаш концерт дене кондыштараш тӱҥальыч. Но мый шоктенам гына, иканат шкетын шогал мурен омыл», - каласкала Сергей.

Кыдалаш образованийым рвезе Музек школышто налын. Интернатыште илымыж годым эрге-влакым сем почеш тывыртаташ кумылаҥден. «Тунем шуытат, ӱстелыш кӱзен шогал тавалтат ыле. Воспитатель, Светлана Васильевна, южгунам тулвондымат куча ыле», - шарналта Сергей. Баян дене шокташ тыгак пошкудо изак-шоляк Леонид ден Юрий Костинмыт туныктеныт. Леня, баяным шоктен, окна гыч вуйжым луктын да йоча-влаклан «Колыштса, Высоцкий мура» манын кычкырен. Сергейын шарнымашыже, йоча жап гыч тӱҥалын, кызытсе кече марте, чыла музык дене кылдалтын.

Л. АЛЫНБЕКОВА, Йывангасола тӱвыра пӧртын вуйлатышыже.

Материалым умбакыже газетыште лудса.