Йочасадыште - марий У ий!

21 декабрьыште Бирск оласе 2-шо номеран «Светлячок» йочасадыште марий йоча-влаклан «Чодыра йомак» У ий пайрем эртыш.

Пайремын организаторжо да вӱдышыжӧ - «Светлячок» йочасадын воспитательже Светлана Геннадьевна Кильдиярова. Тудо пеш поро, тыршышан, эре уым кычалше, йоча-влакым кумылаҥден моштышо айдеме, йочасадыште эн чулым воспитатель-влак кокла гыч иктыже.

Тиде кечын йоча-влак, марий пайрем вургемым чиен, музыкальный залыш погыненыт. Нуным тушто чодыра йомак вучен, Пампалче, Вӱд Он да Чодыра Оза унала толыныт. Пампалче йоча-влаклан юзо шондыкым конден да нуным марла мураш да кушташ таратен. Вӱд Он изи уна-влакым «Йыдал куча» марий калык модыш дене модыктен.

Чодыра Оза (марий историй да тӱвыра рӱдерын тӱҥ специалистше А. Ибулаев) мемнам руш, башкир да марий калык-влакын музыкальный инструментышт дене палдарен, мотор сем-влакым шоктен ончыктен.

Могай У ий пайрем Йӱштӧ Кугыза ден Лумӱдыр деч посна? Нунат мемнан пайремыш толыныт, йоча-шамычым шушаш У ий дене саламленыт да программым умбакыже шуеныт - чылам модыктеныт, мурыктеныт, куштыктеныт. Йоча-влакат Йӱштӧ Кугыза ден Лумӱдырым куандареныт - кугурак группыш коштшо ӱдыр-влак марий куштымашым ончыктеныт, Ангелина Алпаева ден Руслан Кильдияров «Його Япык» сценкым ончыктеныт, молышт марла почеламутым лудыныт. Толшо уна-влак «кандырам пунен» куштеныт.

Пайремна веселан эртыш. Мучашлан Светлана Геннадьевна йоча-влаклан пӧлекым кучыктыш да кажныжлан тазалыкым, поро кумылым, эре тыгай весела, чулым лияш тыланыш. Шарнен кодаш чодыра йомакысе герой-влак дене пырля возалташ ӱжӧ.

Мыйын шонымаште, эртыше У ий пайрем тышке толшо кажне марий йочан чоныштыжо поро кышам коден. Тыгай ямле мероприятийым эртараш полшымылан С. Г. Кильдияровалан, йочасад вуйлатыше Л.А. Шангиналан, марий историй да тӱвыра рӱдерын тӱҥ специалистше А.В. Ибулаевлан пеш кугу таум каласена.

Мыят шкенан марий калыкнам толшо У ий пайрем дене саламлем! Волгыдо илышым, тазалыкым, пиалым, кӱкшӧ сеҥымашым тыланем. Йӧратыза марий йылмынам да марий калыкнам! У ий дене! У пиал дене!

Т. АЛПАЕВА.

Снимкыште: чодыра оза шиялтышым шокта.