Кӧн катаже?

Кӧн катаже?

Тидым икымше теле кечын пален налына

Ӱмаште Нефтекамскысе регион-влак кокласе фестивальын кугу концертше деч вара Оласе тӱвыра полатыште фойе тич ик шагат наре (лачшым гын 55 минут) чарныде куштышо калык деч вара пурак огыл, а… ик ката киен кодын ыле. Кузе озаже мӧҥгыжӧ миен шумо тунарак ок ӧрыктаре. Оҥай веле: молан кычал толын огыл? Катажым ик идалык редакцийыште аралена. Ни кычалше уке, ни чиен лекташ - воштылыт, ни ужалаш - кӧ налеш, мужыр йолчием огылыс… Теве, шижде, вес фестивальнат лишемеш. Можыч, шонена, тушто туфльын озаже ӱмаште йомдарен кодымыжым шарналта? Йолчиемжын вес пелыжым пеленже налын толеш гын, икымше декабрьысе «Марий касыште» мужырге тӱҥ приз семын кучыктена ыле. Вет чапле ката, луктын шуымо йыдал гай огыл. Векат, озаже курчак гай пачката мотор ӱдыр.

Фестиваль концертыште могай уна-влак лийыт? Тыштат шке оҥайже, мыскараже уло. Ончыч «Билет уло?» манын йыҥгыртат. Налын каятат, вара адак телефон дене «А артист-шамычше кӧ улыт, кушеч толыт?» манын йодыт. Паледа, молан билетым налмышт годым огыт рашемде? «Билет деч посна кодшаш ынже лий, молыжым варажымат пален налаш лиеш», - воштылыт. Теве тыгай весела марий-влак Нефтекамскыште илат.

А унала толыт мурышо-куштышо, эстраде, семӱзгар дене шоктышо коллектив да мурызо-влак: «Йоҥгалт, гармонь йӱк!» гармоньчо-влакын ансамбльышт (Агрыз район, Татарстан), «Ший памаш» (Бирск район), «Ӱжара» (Мишкан район) калык, «Алан» (Мишкан район), «Элесия» (Шаран район), «Шӱдыргорно» (Нефтекамск) мурышо, «Рвезылык» (Агидель ола) куштышо ансамбль-влак, мурызо-влак Надежда Пашкина (Йошкар-Ола), Зоя Исламова (Шаран села), Светлана Каншаева (Мишкан район), семӱзгар-влак дене шоктышо талантан музыкант Андрей Иликбаев (Нефтекамск) да молат.

Ты гана концерт деч вара фойеште куштымашланат конкурсым увертараш логалеш докан. Пытартыш еҥ кодмешке кӧ куштен сеҥа? Кеч шуҥгалтмешке, катам йомдарымешке… Тольык мӧҥгӧ ик ката дене пӧртыл ида кай, лектын возеш гын, мужырлан весыжымат кодыза. Уке гын теве ӱмашсыж дене тачат мом ышташ огына пале…

И. ГУБАЕВ.