+15 °С
Ясно
Спорт
23 Сентября , 13:47
«ДИНАМО» ДЕН «ДИНАМО-2» БАСКЕТБОЛ КЛУБ-ВЛАКЫН ЕҤЫШТ ДЕНЕ ВАШЛИЙМАШ
Баскетбол дене модмо 2026/2027 у тургым тӱҥалме вашеш Россий ФСБ-н Башкортостан Республикысе управленийыштыже Башкортостан Республикын «Динамо» ден «Динамо-2» баскетбол клубышт-влакын лӱдыкшыдымылык орган пашаеҥыштын да модшо-влакын вашлиймашышт эртен. «Физкультурно-спортивное общество «Динамо» Республики Башкортостан» регионысо мер организацийын вуйлатышыже генерал-лейтенант И.В. Кочнев саламлыме ойыштыжо палемден: «Динамо» профессиональный баскетбол клублан кӧра Уфаште кугу баскетбол спорт вияҥеш. Оласе калыкын да уна-влакын элын эн сай баскетболистше-влакым шке шинчашт дене ужаш, Российын чемпионатыштыже шке ола верч тургыжланаш, командылан полшаш йӧнышт уло».
Россий ФСБ-н Башкортостан Республикысе управленийжын пресс-службыжын фотожо-влак.
«ЧОЛМАН» ГАЗЕТЫМ МАX-ЫШТЕ ЛУДЫНА!
Россий ФСБ-н Башкортостан Республикысе управленийжым вуйлатыше генерал-майор Р.П. Плотников спортсмен-влаклан пеҥгыде вий-куатым, наставник ден еш гыч шогышо ӱшанле тылым, эмганымаш деч посна модмашым тыланен. «Тек кажне матч тыланда патырлык шӱлышдам вияҥдыше школ семын лиеш, а кажне сеҥымаш болельщик-влаклан куаным пӧлекла да шочмо кундем дене кугешнаш тарата», - каласен тудо.
Вашлиймаш годым спортсмен-влак да нунын еҥышт сеҥымашышт нерген каласкаленыт. Кок ий жапыште «Динамо» баскетбол клуб Высший лигын дебютантше гыч Суперлигын ик лидерже марте корным эртен, Башкортостаныште баскетболым вияҥдыме у этапын символжо семын лийын. Клубым 2024 ийыште негызлыме, 2024/25 ийласе дебют тургымыштак команда Высший лигын шӧртньыжым сеҥен налын. 2025/26 ийласе эртыше тургымышто нуно Суперлигыште сайын дебютым ончыктеныт: регулярный чемпионатыште нылымше верыш лектыныт да плей-оффышто лигын кандаш эн сай командыже радамыш логалыныт. Тугодымак уэш чумырымо «Динамо-2» команда Высший лигыште сай лектышым ончыктен, тудо 2025/26 ийласе тургымышто турнирын бронза медальжым сеҥен налын. Модшо-влак Максим Войтов ден Владимир Фоменко чемпионатын символически палемдыме вич эн сай модшо-влак коклаш логалыныт. Шушаш тургымышто клубын чапшым ВТБ-н самырык-влакын Единый молодёжный лигыштыже «Динамо-М» команда, йоча да самырык-влакын баскетбол дене модмо лигыштыже «Динамо-юниор» команда аралат. Тыгеракын, таче Башкортостан Республикысе баскетболист-влаклан, юниор гыч тӱҥалын, Суперлигысе командын модшыжо марте профессионально кушкаш чыла йӧным ыштыме.
Вашлиймаш мучаште баскетболлан шӱман чыла еҥым 2026 ий 1 октябрьыште Уфа оласе «Динамо» спорт комплексыште эртарыме у тургымысо матчыш ӱжыныт.
