«Старт» лагерь: тазалык да талант апшаткудо

«ЧОЛМАН» ГАЗЕТЫМ МАX-ЫШТЕ ЛУДЫНА!

«Старт» пеш мотор кундемыште ужар кушкыл лоҥгаш верланен. Пӱнчӧ лӱс да шудо пуш дене варналтше яндар южшо - эн сай пӱртӱс ингалятор, йоча-влаклан моткоч пайдале. Лагерьыште йырым-йыр ару, тидым ача-ава-влак гына огыл, тергыше орган-влакат палемдат.

Икмыняр арня каныме жапыште йоча-влак спартакиадыш, усталык фестивальыш, интеллектуал марафоныш, моло мероприятийыш кумылын ушнат, чоныштлан келшыше кружокышто, мастер-классыште у сомыллан тунемыт. Вожатый-влакын палемдымышт почеш, «Старт» йочан яра жапшым айлаш гына огыл, тудын моштымашыжым почын пуашат полша. 

Тений кеҥежым спортлан да лӱдыкшыдымылык йодышлан кугу тӱткылыкым ойыреныт. Кокымшо сменыш республикысе спорт клублаште шуаралтше самырык каратист-влак погыненыт (снимкыште). Нуно «Стартыште», яндар южышто, тренировкыштым умбакыже шуеныт: кажне эрдене разминкым, кас еда показательный «спарринг-влакым» эртареныт.

«Старт» вожатыйже-влак денат кугешнен кертеш. Лагерьысе шокшо келшымаш шӱлышлан нуно вуйын шогат. Педагогике отрядым кугурак вожатый Карина Янситова вуйлатен. Тудын дене пырля рвезе-влакын кумылышт да дисциплинышт верч уста вожатый-влак Алина Фатыхова, Анастасия Трофимова, Оксана Айкашева, Евгений Калимьянов, Егор Гурьев да Евгений Андреев тыршеныт. Нуно йоча-влакын кугурак йолташышт, наставникышт лийыныт, нунак кажне кечым мондалтдыме приключенийыш савыреныт.

«Старт» лагерь - йоча-влакын йӧратыме верышт. Тусо пӱнчӧ юж, спорт, усталык да вожатый-влакын тату командышт - чылажат кажне йочалан мӧҥгыжӧ шуаралтын, вий-куатым поген, кумылаҥын да изишак кугем пӧртылаш полша. 

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!