Землякнам шарнен илена

Геннадий Михайловичын уло илышыже спорт дене кылдалтын. Тудо 1969 ий 12 апрельыште Шаран районысо Янахмат ялын Гулчаська ден Михаилын ешыштышт нылымше икшыве шочын. Тиде ялыштак школыш коштын, кандаш классым тунем лектын. Пеш ответственный да тыршышан рвезе лийын. Школ деч вара Стерлитамакысе физкультур техникумыш тунемаш пурен. Тыршен тунемын, ече дене пеш устан коштын. Техникумым шӧртньӧ медаль дене тунем лектын. 1988-1990 ийлаште армийыште служитлен. Пӧртылмеке, пошкудо Акпарс школышто физкультурым туныктен. Ик ий гыч тудым тунем лекме техникумышкыжо ече спорт кафедрыш пашаш ӱжыныт. Геннадий, шуко шонкалыде, тушко куснен. Тудо ийынак Омск кугыжаныш институтыш заочно тунемаш пурен. Техникумышто ончыкылык пелашыжым вашлийын, ешым чумырен. 

1998 ийыште ешыж дене Ханты-Мансийск автономный округын Нягань оласе олимпийский резервым ямдылыше школышто тренерлан ышташ тӱҥалын. 2006 ийыште Геннадий Михайловичым спорт школын директоржылан шогалтеныт. Тудын вуйлатымыж годым биатлон, ече, полиатлон, хоккей спорт вияҥыныт. 2014 ийыште землякнам Ханты-Мансийск олаш кусареныт. Тушто ХМАО-Югран биатлон дене сборный командыжын тренерже лиеш. 2022 ийыште Губкинский олаш пашаш кусареныт. Тушто ик ий веле ыштен шуктен. Чаманен каласаш логалеш, кеҥежым шочмо ялышкыже канаш толмо жапыште ӱмыржӧ кӱрылтын...  

Геннадий Ибяевын Елена Маркияновна пелашыжат спорт аланыште пашам ышта. Тудо Геннадий Михайловичлан эре полшен, умылен. Кызыт Ямало-Ненецкий автономный округын Губкинский ола администрацийжын физический культура да спорт шотышто управлений вуйлатышын алмаштышыже улеш. 

Геннадий - кум ӱдырын ачаже. Надежда Югорский кугыжаныш университетым тунем лектын, Анастасия Стерлитамак оласе физкультур колледжым йошкар диплом дене пытарен, Аксинья ӱдырышт 11-ше классыште тунемеш. Аксинья ачери-биатлон дене Российын спорт мастерыш кандидатше, элын сборный командыжын еҥже улеш. 

Геннадий Михайлович вес кундемыште илен гынат, шочмо-кушмо ялышкыже да тунемме техникумышкыжо эре толын коштын. Ечызе-влаклан полшен, чыла денат мутланен, вашкылым муын моштен. Тыгай айдеме илышыште ок мондалт. 

Г.М. Ибяев лӱмеш ий еда ече таҥасымаш эртаралтеш. Тений тудым кумшо гана эртарыме. Тыгай таҥасымаш эн ондак школышто, шочмо-кушмо ялыштыже, вара районышто лийын. Районыш ече спортым йӧратыше-влак тӱрлӧ верла: Туймаза, Октябрьский, Стерлитамак олала, Серафимовский села да Мишкан район гыч - погыненыт. Ече пайремыш 200 утла ечызе чумырген. Чылаштланат Геннадий Михайлович лӱм дене медальым кучыктымо, призер-влаклан Кубок ден грамотым пуымо. Чыла тиде наградым Геннадийын йолташыже, шочшыжо, коллегыже-влак полшымо дене ямдылыме.

Каласыде ок лий, 2024 ийыште тыгак Геннадий Михайловичым шарныме лӱм дене Янахмат школышто мемориальный оҥам почмо. Чыла тиде сомылым калыкын да йолташыже-влакын полшымышт дене шуктымо. 

Ме Геннадий Ибяев дене кугешнена. Тудо самырык тукымлан пример. Геннадий Михайлович - Российысе физический культура да спортын отличникше, Башкортостан Республикысе физический культура да спортын заслуженный пашаеҥже, биатлон да ече спорт дене всероссийский категориян спортивный судья.