Вуйнам савена, шарнен илена

М. Байрамов Кульчубай пелекыдалаш, Чорай кыдалаш школлаште шинчымашым поген. Тале спортсмен лийын, ече дене куржталаш йӧратен. Ик гана веле огыл районын, республикын чемпионжо лийын, биатлоныштат вийжым терген, садланак, кунам профессийым ойырен налаш жап шуын, тудо физкультурым туныктышо лияш кумылаҥын. Пример да наставник воктенжак лийын - тиде ачаже, кумдан палыме туныктышо да тренер Леонид Анатольевич Байрамов. Стерлитамак оласе физкультурный институтым тунем лекмеке, Марсель паша корныжым Нерге школышто тÿҥалын. 2017 ий июньышто призыв почеш службым эрташ ушнен. Ик жап гыч контракт почеш служитлаш тÿҥалын. СВО каен шогымо Украин мландыште сарзе порысшым шуктымыж годым 27 ияш самырык рвезе вуйжым пыштен. 

Мероприятийыш калык шуко погынен: изижат, самырыкшат, илалшыжат. Бирск, Благовещенск ола-влак, Мишкан, Бурай, Чорай селала, Тынбай, У Тынбай, Кульчубай, Ардаш, Ирсай, Монар, Изи Накаряк ялла гыч 100 наре еҥ толын. Игечыжат сай шоген, йырым-йыр поро шÿлышым шарен. Мотор теле кече Марсельым пагалыше, шарнен илыше да таҥасаш толшо-влаклан лÿмынак кÿшыч шыргыжын. Туге чучын, пуйто геройна кава гыч куанен ончен. 

Таҥасымаш тÿҥалме деч ончыч аваже-ачаже, родо-шочшыжо, палымыже, уна-влак Марсельлан почмо мемориал оҥа воктеке пеледышым пыштеныт, тудым шып шоген шарналтеныт. 

Положений почеш стартыште изирак ийготан-влак, вара кугурак тунемше, илалше, спортын ветеранже-влак шке жапыштым вученыт. Чылан сай лектышым ончыкташ да финишыш эн ончыч толаш тыршеныт. Таҥасымашын эн изи участникше  кок ияш Леонид Кутлияров лийын. Ачашт, В.В. Кутлияров, тыгак ныл ияш Даниил эргыже, Бурай гыч таҥасаш толыныт. Нине кок изи рвезе ече спортын чинче падырашыже гай койыныт. В.В. Кутлияров Марсельын лишыл йолташыже, биатлон дене спорт мастер, Пӧкленде ялын шочшыжо улеш. Кызыт ешыж дене Бурай селаште ила да кокымшо гимназийыште физкультурым туныкта. 

Эн кугурак ийготан-влак кокла гыч Борис Сагитович Сайфутдинов лийын, Д.Т. Тимиркаевын воспитанникше, Пÿрӧ ола гыч толын. «Ече дене 1969-ше ий гыч кошташ тÿҥалынам, тиде мыйын хобби», - каласыш ече спортын ветеранже.

Сеҥыше-влакым ийгот дене ончалаш гын, сÿрет тыгай: 2016 ийыште шочшо да тулеч изирак-влак коклаште 1 вер - Архип Александров (Ардаш), 2 вер - Максим Сайранов (Тынбай), 3 вер - Радмир Востаев (Пÿрӧ ола); 2014-2015 ийыште шочшо-влак коклаште: 1 вер - Кира Алиева (Чорай), 2 вер - Екатерина Ямурзина (Кульчубай), 3 вер - Эрвелина Юзукбаева (Чорай), 1 вер - Матвей Иванов (У Тынбай), 2 вер - Матвей Булатов (Изи Накаряк), 3 вер - Вадим Яндубаев (Токтар); 2012-2013 ийыште шочшо-влак коклаште: Илона Ямиданова (Изи Накаряк) - 1 вер, Арианна Александрова (Ардаш) - 2 вер, Илона Абтыкаева (Ардаш) - 3 вер; Иван Иванов (Ардаш) - 1 вер, Тимофей Кутлуметов (Ардаш) - 2 вер, Максим Салмияров (Изи Накаряк) - 3 вер; 2009-2011 ийыште шочшо-влак коклаште 1 вер - Амалия Васюткина (Ардаш), 2 вер - Амелия Николаева (Изи Накаряк), 3 вер - Ларина Масаева (Ирсай); 1 вер - Ярослав Ялитов (У Тынбай), 2 вер - Алексей Иванов (Ардаш), 3 вер - Артём Сагитов (Ардаш). 

Ече спортын ветеранже, тыгак район, республика кÿкшытыштӧ сеҥыше спортсмен-влакат сай лектышым ончыктеныт: 18-39 ияш-влак коклаште Светлана Ялитова (У Тынбай), Милена Сайранова (Тынбай), Диана Шамиева (Кульчубай), Эдгар Ахмадишин (Ардаш), Виталий Шумаев (Изи Накаряк), Владислав Кутлияров (Бурай), 40-49 ияш-влак коклаште Андрей Сайсанов (Монар), Дмитрий Шайбаков (Благовещенск), Вадим Ямаев (Кульчубай), Инесса Ахмадишина (Ардаш); 50-59 ияш-влак коклаште Эдуард Ишалин (Мишкан), Валентин Саликов (Тынбай), Радик Губаев (Бирск), Марина Абдулина (Тынбай); 60 да кугурак ийготан-влак коклаште Светлана Иванова (Тынбай), Борис Сайфутдинов (Бирск), Михаил Шамратов (Тынбай) ойыртемалтыныт. Пÿрӧ ола гыч Николай Голощапов вич тале спортсменым конден. Икманаш, Марсельым шарнен, пагален, ече спорт дене кылым кучымыштым ончыкташ толшо еҥ ятыр лийын. 

Таҥасымаште сеҥышыш лекше-влакым Марсельын ачаже Леонид Анатольевич, район гыч толшо уна да акаже-влак саламленыт. Ялысе клубышто поян ÿстелым погымо. Марсельын аваже, акаже, пошкудыжо-влак кажным шокшо чай да тамле кочыш дене сийленыт.

Тыгай таҥасымаш-влак самырык тукымым таза илыш-йÿлам кучаш, спортым йӧраташ, вий-куатым пеҥгыдемдаш, шкалан ÿшаным ешараш полшат. Тиде таҥасымаш ятыр еҥын чоныштыжо кужу жаплан волгыдо шарнымашым кода. Землякнам ончыкыжат шарнен илаш тÿҥалына, а тудын лÿмеш эртарыме таҥасымаш тек ÿмыреш калык чонышто ила.