«Шорыкйол пайрем» турнир

Тудо пошкудо ялласе рвезе-шамычымат таратен. Тыге нуно паша деч вара, яра татым ойырен кертмышт семын, ямдылалташ пижыч. Шукыштын ешыштат, икшывыштат уло (Кызытсе илышыште жап ок сите манаш тыгай амалым кучылтыт вет.), но нимат огыл, рвезылык чылажымат сеҥен, чылашкат шуын кертеш… Ялыште спортым йӧратыше еш моткоч шуко, тиде - путырак сай тӱҥалтыш. 9 январьыште ик шагат кечываллан школ тӓҥгӓлне мыняр шуко машина чумырген!

Кужнур командын модшыжо-влакын пелашышт, шочшышт толыныт. Самырык-влаклан тыгай турнир шукертак лийын огыл. Шукыштлан школысо спортзал тунемме жапыштым шарныктен, тидыже шинчашт гычак койын. 

Нуным ужын, шканемат ончычсо тунемшем-влакын изи годсо жапышт сӱретлалтеш… Мом манаш, чыланат шинчаончылно кушкыныт: тиде - тӱҥ судья да командым ямдылыше Рудольф Николаев, Филипп Паликов (капитан), Роман Михайдаров, Михаил Асмаев, Олег Захаров, Александр Айгузин, Вячеслав Кугубаев; изирак ийготан Кужнур командым Алмаз Файрузов, Никита Мусагитов, Алексей Мусагитов, Станислав Япаров, Радик Николаев чоҥеныт.

Кугу Соказа (Мишкан район) гыч толшо-влакын капитанышт Ростислав Зайниев лийын, Бажан рвезе-влакым Алексей Сайпанов вуйлатен.

Турнир деч вара ойыртемалтше волейболист-влакым шкеныштын номинацийыштышт палемдыме: «Эн сай защитник» лӱмым Михаил Асмаев (Кужнур) сулен, «Эн сай модшо» - Александр Ишкамаев (Кугу Соказа, Мишкан район), «Эн сай нападающий» приз Расул Зиннатуллинлан (Бажан ял) логалын.

Сай оза унажым кӓдырлӓ маншыла, шкенан ял рвезе-влак турнирыште кумшо верым нальыч. Бажан ялын командыже кокымшо лие, а икымше верыш Кугу Соказан рвезышт-влак лектыч.

Сеҥыше-влакым палемдымаш церемонийыш мемнан ялын чылалан палыме айдемым - Уфаште, Дӧртыльыштӧ, Казаньыште да моло кундемлаште куштылго атлетика дене эртарыме марафонлаште, Юл ден Урал кундемласе таҥасымашлаште шуко гана призер лийше да сеҥыше Гера Семнеевич Исинбаковым - ӱжмӧ. Волейбол турнирын тӱҥ секретарьже да вӱдышӧ Анастасия Николаева каласыш: «Таче мемнан дене йолташ-влак коклаште эртарыме турнирыш эн сай деч сай рвезе-влак чумыргеныт. Сулен налме наградыда тек эре ончыко ӱжеш»! Пагалыме унана, Г.С. Исинбаков, саламлен ойлымыж годым тыгай виян шомакым каласен кодыш: «Спортышто сеҥышыш лекташ тыршен ямдылалтмашлан да кыртмен пашам ыштымылан нимо ок шу!» Ончыкыжым ялысе йоча-влаклан шкенжын гай моштымашыш шуаш туныкташ сӧрыш.

Мыят шке шонымем ешарышым: «Вет тӱҥжӧ эре сеҥышыш лекмаште огыл, а тиде сылне теле кечын спортын вийжым пален налмаште, йолташ-влакым иквере чумырен моштымаште. Йырысе яллаште кушшо рвезе тукымын келшен илымыже, икте-весым колыштын, пагален моштымыжо - теве мо эн шерге! Тыге илаш келшымашым перегыше, спортым йӧратыше калык веле сай примерым ончыктен кертеш. Тыгай годым иктым раш умылыман: ончыкылык модмашлаш могай ситыдымашым кораҥдаш палемден, ойырен моштен, ончык ошкылаш кӱлеш».

Икманаш, Шорыкйол пайремлан келыштарыме волейбол турнир моткоч веселан да шокшын эртыш. Иктынат ӧпке чурийжым шым уж. Чонышто каласен моштыдымо куан шочо. Моланже пале: нине рвезе-шамычын шке кумылышт дене чумыргымо тыгай мероприятий - чонлан эм. Вет тидым ала-кӧн шӱдымыжӧ почеш «галочкылан» але фотоотчётлан эртарыме огыл, а чон ӱжмӧ дене ыштыме. Таче сеҥышыш, призёрыш лектынат але сеҥалтынат - чынже тыште огыл, а тӱшкан погынен моштымаште, командыште келшен модмаште. Тидыже - эн кугу паша, эн кугу сеҥымаш. Тыгай пашашке ушнен кертше-влак коклаште сеҥалтше ок лий. Мастарлыкым, вий-куатым, келшымашым ончыктен моштымашда у сеҥымаш-влакым тапташ ончыжымат кумылаҥден шогыжо!