Турслетышто мастарлыкыштым шуареныт

Слетын икымше кечынже йоча-влак икте-весе дене палыме лийыныт - команда дене палдарыме усталык конкурсышто мастарлыкыштым ончыктеныт. Мемнан команда келшымаш, историй нерген каласкалыше оҥай программым ямдылен. Кокымшо кечын ӱдыр-рвезе-влак спорт ориентированийыште таҥасеныт. Спорт ориентирований - тиде туристын ик эн кӱлешан моштымашыже, тудо вер-шӧрыштӧ ориентирым писын муын моштымым да кузе лияш кӱлмӧ шотышто чын корным муын моштымым терга. Йоча-влак тыгак «водная» дистанцийыште катамаран дене ийме конкурсышто вийыштым тергеныт - командыште пашам ыштен моштымыштым, нелылыкым чытымыштым ончыктеныт. Тиде кечым уш-акыл пӱсылыкым, логически шонен моштымашым шуарыше модмаш иктешлен. Кумшо кечын программыже «дистанция - пешеходная» да «дистанция - пешеходная группа» таҥасымашла гыч шоген. Индивидуальный дистанцийыште Айгуль Хурматуллина ойыртемалтын - писылыкым, чытышым, сай технический моштымашым ончыктен да 1-ше верыш лектын. Тӱшка дистанцийыште мемнан командына (А. Абдуллина, Б. Тойгузин, Р. Сайфулин, А. Хурматуллина) кумшо верым айлен. 

Башкортостан Республикын спорт туризм дене Первенствыжын чумыр зачетыштыжо пешеходный дистанцийлаште «Путник» туризм рӱдерын командыже кумшо верыш лектын. Командым, нунын тренерышт А.Н. Небогатиковам да Р.И. Султаншиным саламлена да ончыкыжат у кӱкшытыш, у сеҥымашыш шуаш тыланена!