-27 °С
Пылан
Все новости
Спорт
24 Июнь , 16:02
Стерлитамакыште ГТО-лан лӱмлымӧ фестиваль эртен
17-20 июньышто Стерлитамак олаште республикысе школлаште тунемше-влак коклаште «Готов к труду и обороне» элысе физкультур да спорт комплексын кеҥежымсе фестивальже эртен. Тушто кундемнан Краснокам, Янаул, Шаран, Караидель, Дӧртыльӧ, Бурай да моло районлаже, тӱрлӧ олалаже гыч мийыше 35 команда эн тале улмо верч таҥасен.
ГТО фестивальыште ола округ-влак коклаште сеҥыше команда-влак. Шола гыч пурлашке: Стерлитамак (2-шо вер), Кумертау (1-ше вер), Нефтекамск олала (3-шо вер) гыч мийыше ӱдыр-рвезе-влак.
Кум кече жапыште ӱдыр-рвезе-влак 60 метр кужытыш, тыгак 3 километр кроссым куржмаште, перекладиныште кап-кылым нӧлтымаште, отжиманийым ыштымаште, 50 метрыш иймаште, электрон оружий гыч лӱйкалымаште, кужытыш тӧрштымаште, тыгак эстафетыште вий-куатыштым тергеныт.
ГТО-лан лӱмлымӧ таҥасымашыш Нефтекамск олан командыжат ушнен. Оласе тӱрлӧ школла гыч 12-15 ияш тунемше-влакым чумырымо командым таҥасымашыш 17-ше школышто физкультурым туныктышо А.Н. Ершова ден ГТО дене тестированийым эртарыме муниципальный рӱдерын тӱҥ судьяже А.М. Галиханов намиеныт. Марий тренер Ангелина Николаевнан мутшо почеш, яра жапыште нуно йоча-влак дене пырля республикынан кечывалвел ужашыжын сылне вер-шӧржым, оҥай верлажым ончал савырненыт, тыгак Торатау шихан воктене лийыныт.
«Готов к труду и обороне» элысе физкультур да спорт комплексын кеҥежымсе фестивальыштыже ола округ-влак коклаште 1-ше верыш Кумертау, 2-шо верыш Стерлитамак, 3-шо верыш Нефтекамск олалан командышт лектыныт. Ола поселениян район-влак кокла гыч 1-ше вер дене Янаул, 2-шо вер дене Белорецк, 3-шо вер дене Белебей олалам палемденыт. Сельский поселениян район-влак коклаште Гафури районын командыже икымше, Краснокам районын командыже кокымшо, Иглин районын командыже кумшо верлам айленыт.
ГТО-н ик дисциплиныже - пневматический винтовка гыч лӱйкалымаш.
Новости партнеров