Емметыште рвезыжат, шоҥгыжат ечыгорныш лектыныт

Тиде таҥасымаш Российыште Шочмо Элым аралышын, Башкортостаныште СВО-н участникше-влаклан да нунын ешыштлан полшымо, Кугу Ачамланде сар пытымылан 80 ий темме идалыкым почмо семын эртен. Ече дене куржаш йочасадыш коштшо йоча, тунемше, студент, самырык да кугу ийготан-влакат шукын миеныт. Спортсмен-влак Еммет гыч веле огыл, Урсай, Мешер, Янахмат, Нурей, Изимка ялла да Туймаза ола гычат лийыныт. Таҥасымашын тӱҥ инициаторжо да организаторжо - Еммет ялын эргыже, Югорск олаште илыше Александр Митрофанович Акмурзин. Кызыт тудо пелашыж дене ялыш отпускыш толын. Снегоход дене тошкен, Александр пеш сай трассым ямдылен. Ийготым шотыш налын, ечызе-влак, 500 метр гыч тӱҥалын, 3 километр марте кужытыш таҥасеныт. 

Таҥасымаш тӱҥалме деч ончыч погынышо-влакым Нурей сельский поселенийын вуйлыкшо О.И. Атнагузина да А.М. Акмурзин саламленыт, спортсмен-влаклан ечыгорнышто писылыкым, сеҥымашым тыланеныт. Ечызе-влак шым этап дене куржыныт, чылаже шым сеҥышым ойыреныт, 42 еҥ призёр радамыш логалын. Чылаштымат диплом да пӧлек дене палемденыт. Ечызе-влак кокла гыч Мешер ялыште илыше 78 ияш Салим Асылгузин эн шоҥго, Еммет ял гыч 5 ияш Тимур Каюмов эн изи участник лийыныт. Таҥасымашын тӱҥ судьяже - В.Б. Ишумбаев, РФ Просвещенийын отличникше, 1-ше категориян тренер, республикысе кӱкшытан судья. Таҥасымаш деч вара нойышо, но куаныше спортсмен-влакым тамле кочкыш да шокшо чай дене И. Минькаев, А. Ахтареев, В. Гафиятуллин сийленыт. «Шочмо ялыштыже тыгай пайремым эртарымыжлан уло калык лӱм дене Александр Акмурзинлан тауштем! Кресаньык-фермер озанлыкым вуйлатыше Азат Фанисович Аглиуллин таҥасымашын спонсоржо лийын, сеҥыше да призер-влаклан пӧлекым налын ямдылен. Полшымыштлан кугу тау!» - куанен каласен О.И. Атнагузина.