Ветеран-влак огыт шоҥгем

Монар воктенсе  Орвуй курык шке моторлыкшо дене торашке волгалт шога. Курык йымалне шуйналт вочшо ечыгорныш лекташ Монарыш Бурай, Бирск, Благовещенск, Аскын районла гыч, Уфа, Стерлитамак да Пӱрӧ олала гыч спортсмен-влак толыныт. Мишкан район гыч эн шуко участник лийын. Ечызе-влак Мишкан, Изи Накаряк, Тынбай, Чорай, Ардаш, Кульчубай, Нерге, Пекшек, Кемий ялла гыч чумыргеныт.

Участник-влакым таҥасымашын организаторжо-влак кумылын саламленыт, толмыштлан тауштеныт  да ече корнышто сеҥымашым тыланеныт. Ме неле жапыште илена,  таҥасымашке толшо-влак шке участвоватлымышт дене специальный военный операцийын участникше-влаклан полшаш кӱлмӧ кумылым ончыктеныт.

Ты спорт мероприятийым эртараш полшышо районысо спорткомитетын председательже А. Фатхинуровалан, ДЮСШ-н директоржо Р. Ямаевлан кугу таум ойлыман.

Мероприятийын цельже - тӱрлӧ ийготан еҥ-влакым спорт деке шӱмаҥдаш, таза илыш-йӱлам калык коклашке шараш.

Стартым пуымо деч вара тале-влак вигак рашемыныт, нуно  шке тӱшкаштым писын ончылтен, ончыко куржыныт. Но ечыгорнышто чылажат лиеш, эн ончыч куржшыжат шеҥгелан кодын кертеш. Икманаш, спортсмен-влак кокласе дистанций жапым минут огыл, а секунд гына ойырен. Опытан-влак вийыштым финаллан кодаш тыршеныт. Ик дистанцийыште кок спортсмен таҥ куржыныт, иктыжат ончык лектын кертын огыл. Чылажымат пытартыш метр-влак решатленыт. Таҥасымаш пеш пӱсӧ, оҥай да пайдале лийын. Чаманаш веле кодеш, тыгай кугу спорт мероприятийым эртарымаште Монар сельсовет ӧрдыжеш кодын, нимо дене полшаш шотым муын огыл.

Мероприятий дистанцийым ямдылыме гыч тўҥалын. Таҥасымашым эртарыме, оксам мумо йодышлам тўрыснек Губеевмытын еш шке ўмбакше налын. Мемнан икшывына ден уныкана-влак чот полшеныт. Поснак эн изи уныкана Радион Яндуганов ден аваже Кристина Станиславовналан кугу таум ойлена. Нуно тораште илат гынат, теле каникул жапыште  ечыгорным ышташ полшеныт. Уна-влакым вашлиймаште мыланна кугу полышым Монар СДК-н пашаеҥже-влак, «Виктория» волонтер группа (вуйлатыше Э. Иманова) ыштеныт. Монар ялысе ветеран-влак совет председатель А. Сайсановалан кугу тау. Кажне ийын тыгай таҥасымашым эртарыме годым тудо уна-влакым кинде-шинчал дене вашлиеш, шокшо чай дене сийла. Таҥасымашым эртараш  физкультурым туныктышо, тренер Дмитрий Губеев, тренер-преподаватель, йоча садын воспитательже Светлана Яншаевалан таум ойлена. Светлана Яншаевна кумшо ий почела таҥасымашым сайын эртараш полша. Монар ялысе дошкольный группын ты таҥасымашке ушнымыжлан пеш куаненна.

Таҥасымашын эн самырык участникше тений Бурай район гыч Д. Кутлияров лийын, эн кугу ийготан участник - И. Иркабаев. Ече дене таҥасымаште чылаже 83 еҥ участвоватлен. Нунын коклаште районысо спортын ветеранже-влак И. Самниевым, Г. Аптраевым, В. Янкиевым, И. Иркабаевам, Пӱрӧ ола гыч Н. Голошаповым, И. Байбуриным палемдыман. Нунын участвоватлымышт таҥасымашлан йӧршын вес шӱлышым пуртен.

Мутат уке, изак-шоляк Губеевмытын эртарыме ты таҥасымаш ваштареш шогышо-влакат улыт. Но, манмыла, «пий опта, мардеж наҥгая». Тыгай мероприятийым ме ынде кумшо гана эртарена. Ончыкыжымат эртараш, йоча-влакымат, кугыеҥ-влакымат спорт пайрем дене куандараш тўҥалына.