Уфаште начарын колшо-влакын спартакиадышт эрта

Спортын вич видше - футзал, курык гыч ече дене мунчалтымаш, шахмат, хоккей да керлинг - дене таҥасымаш-влак тӱрлӧ верлаште эртат. Тиде тӱҥ шотышто Уфа оласе спорт объект-влак, керлинг дене спортсмен-влак Ишимбай олаште, «горнолыжный спорт» дисциплиныште «Металлург-Магнитогорск» рӱдерыште таҥасат. 

Спартакиадыш толшо-влак 10 февральыште «параллельный слалом» дисциплиныште эн тале улмо верч кучедалыныт. БР Спорт министерствын увертарымыж почеш, тушто пӧръеҥ-влак коклаште 1-ше верыш А. Казанцев (Свердловск кундем), 2-шо верыш Э. Хадалжан (Москва), 3-шо верыш К. Истомин (Свердловск кундем) лектыныт. Ӱдырамаш-влак коклаште Москва гыч М. Сафина икымше, ХМАО-Югра гыч А. Рябинина кокымшо, Москва гыч А. Сурмилина кумшо лийыныт. 

Спартакиадын участникше да уна-влаклан рӱдолаште тӱвыра программымат ямдыленыт. Уфасе «Гостиный двор» манме верыште кид дене ончыктылмо йылмым палыше пашаеҥ-влак олам шкевуя ончен савырнаш полшышо видеогидан картым пуат. Тушто тыгак чыла кумылан-влак тӱвыра да каныме верлаш: кинош, автобус дене кайыме экскурсийыш, театрыш - тугок билетым налын кертыт.