Йӱдымсӧ ориентирований дене таҥасымаш

Тушко авашт-ачашт, лишыл еҥышт дене 48 йоча - «Самырык турист» ден «Спорт туризм» объединенийлаште шуаралтше ӱдыр-рвезе - погыныш. «Путник» рӱдерын директоржо В.А. Князев нуным таҥасымашын условийже дене палдарыш. Участник-влаклан эртышаш маршрутын картшым кучыктышна. Кажне йоча картыштыже ончыктымо контрольный пункт-влакым чын радамлен палемдышаш ыле. Нунын пашаштым аклыме годым дистанцийым эртыме жапыштым, картысе пунктым чын палемдымым шотыш нална. Таҥасымаш-влакым пычкемышыште эртарышна гынат, чыла йоча заданийым шуктен керте. Йоча-влак таҥасымаш годым икте-весыштлан корным саҥгаш пижыктыме фонарик да телефон дене волгалтарышт. Оҥай таҥасымаште вийым тергыше чыла йочам «Путник» туризм рӱдерын грамотыжо дене палемдышна.