Ешге спортлан шӱман улыт

Нуно оласе мер илыш дечат ӧрдыжеш огыт код. Поповмыт яра жапыште хоккей матчыш, имне дене кудалме турнирым ончаш мият, «Авам, ачам да мый - спорт шӱлышан еш» таҥасымашыште, «ГТО» Всероссийский физкультур да спорт комплексыште вийыштым тергат, кажне кастене яндар южышто коштын савырнат. Аня ден Ваня рӱдоласе 97-ше школын 1-ше да 4-ше класслаштыже тунемыт. Ваня шахматым, спорт туризмым йӧрата. Аня спорт школыш аэробика занятийыш коштеш. Авашт, Ульяна Игорьевна, территорий-влак дене пашам ыштыше специалистлан тырша, ачашт, Денис Станиславович, Йӱдвелне нефтяной компанийыште производственно-технический службын тӱҥ специалистше улеш.  

Кодшо арнян Поповмыт «Россий - спорт кугыжаныш» XII тӱнямбал форум годым Уфаште ошкылмашын Всероссийский кечыжым палемдыме акцийыш ушненыт. Тугодым нуно - авашт Ульяна Игорьевна Аня, Ваня икшывыже-влак дене пырля (Ачашт пашаште лийын.) - рӱдолан уремлаж дене тенийсе идалыклан лӱмлымӧ 2024 метрым ошкыл эртеныт. «Тынар вий-куатым погышна! Ик идалыклан сита! Йоча-влаклан, кумылыштым нӧлталын, финишыште изи медальым кучыктышт. Спорт полатыште республикысе спорт сеҥымаш-влак дене палдарыше выставкым ончен савырнышна. Гагаринын кубокшым лишыч ужмо гына мом шога!» - куанен ойла спортлан шӱман еш.