«Россий - спорт кугыжаныш» форум кузе эртен

Форумышто Российын Президентше Владимир Путин участвоватлен. 

«Тений Уфа 450 ияш лӱмгечыжым палемда. Ты оласе да чумыр республикысе калыкым тиде кугу событий дене саламлынем да мемнан кугу элнам вияҥдымашке надырым пыштымыланда таум ойлынем. Форумыш толшо-влак тысе калыкын унам вашлийын моштымыжым аклат да тиде пеш ожнысо кундемын историйже, ойыртемалтше тӱвыра поянлыкше, спорт йӱлаже, кундемын кызытсе сеҥымашыже-влак дене кумылын палыме лийыт манын ӱшанем, - каласен Президент форумын пленарный заседанийыштыже.

Могай йодышлам каҥашеныт?

Форумын тӱҥ площадкыжлан шукерте огыл почылтшо Кучедалмаш полатым ойырен налыныт. Пайремын паша ужашыжымат: конференций, «йыргешке ӱстел» йыр мутланымаш, сессий, семинар-влакым - тушто эртареныт. Спорт отрасльын да властьын еҥышт элысе да тӱнямбал спортын ончыкылыкшо дене кылдалтше йодышлам каҥашеныт.

Форумышто тӱҥ шотышто спорт дене шукырак еҥлан заниматлаш йӧным ыштыме нерген мутланеныт. Эл Президент власть тидлан чылажымат ышташ тӱҥалеш манын ӱшандарен. «Ончыкыжат тӱшка спортым, тӱшка спорт толкын-влакым доступныйракым ышташ тыршена. Профессиональный спортсмен, тыгак спортын адаптивный видше-влак дене заниматлыше-влакым пайдалын ямдылаш йӧным ыштена. Ӱшанем, бизнесын, кугыжанышын, обществын тӱшка вийышт дене ты шонымашке шуына», - каласен тудо.

Владимир Путин йоча спортым коммерциализоватлымым чараш кӱштен да «чыла вере шотым палаш» темлен. Шкенжын мутшо почеш, чылалан оксам тӱлыман лиеш гын, тудо нигунам спорт мастер лийын ок керт ыле, вет ешыштышт уто окса лийын огыл. 

Башкирийыште ончыкыжат спорт объект-влакым чоҥаш тӱҥалыт

Спортын доступный улмыж дене Башкирий элысе моло кундем-влак деч сай велым ойыртемалтеш. Статистик-влакын шотлымышт почеш, республикыште кок миллион утла, кажне кокымшо еҥ эреак спорт да физкультур дене заниматла. Шукырак еҥым таза илыш-йӱлам кучаш тараташ манын, ола ден селалаште спорт комплекс, стадион, тренажер зал-влакым чоҥат, кудывечылаште спорт площадка-влакым йӧнештарат. Спорт сооружений-влакын чотышт дене республика Москва деч вара кокымшо тошкалтышым айла. Спорт сооруженийым ситарымаш элыште 61,4% гын, Башкирийыште - 74,5%. Пытартыш ийлаште Уфаште икмыняр кугу спорт объектым - Кучедалмаш полатым, Гимнастика рӱдерым, Шорт-трек рӱдерым, Спортивный ямдылалтмаш рӱдерым - чоҥымо. «Россий - спорт кугыжаныш» форум вашеш Уфаште Фехтований рӱдерым да Гребной слалом комплексым, Нефтекамскыште бассейнан, волейбол, баскетбол, мини-футбол дене модаш лийме залан «Амфибия» спорт комплексым почмо.

Башкортостанын Вуйлыкшо Радий Хабиров Владимир Путинлан «Россий - спорт кугыжаныш» форумым эртараш республикынам ойырен налмылан таум каласен да «Ме спорт объект-влакым мучаш марте ыштен шуктена да ончыкыжымат чоҥаш тӱҥалына» манын. Республика вуйлатышын порученийже дене ончыкыжым вич ий коклаште Башкирийыште эше 1,5 тӱжем у спорт объектым, ты шотыштак индеш ФОК-ым, вич бассейным, кок ий ареным да ныл стадионым, Бокс рӱдерым да Теннис академийым чоҥынешт.

Профессионал-влаклан старт

У объект-влакым чоҥымо дене Уфа элын спортивный гына огыл, мультиспортивный площадкышкыже савырна. Ынде, республика гыч кайыдеак, кучедалмаш, фехтований, хоккей, гребля, спортивный да художественный гимнастика, шорт-трек да спортын моло видше дене профессионально заниматлаш да сеҥымашке шуаш лиеш. Тыште тӱнямбал кӱкшытан тӱрлӧ таҥасымашым эртараш йӧн уло. Тидлан кӧра Уфа региональный значениян ола гыч тӱнямбалне палыме мегаполисыш савырна.

Мемнан ойыртемалтше спорт объектна-влак - рӱдоланан архитектур кугешнымашыже - шкенан республикын спорт дене кылым кучышо ӱдыр-рвезыже-влакым гына огыл, вес кундемласе тренер ден спортсмен-влакымат сымыстарат.

«Ме спорт сферыште ятырлан ончык тошкалынна. Тугат ончыкыжат отрасльын базыжым пеҥгыдемдаш шонена - куштылго атлетик манежым, Боксым вияҥдыме рӱдерым, Теннис академийым чоҥынена. Муниципалитетлаште, эше чоҥымо огыл гын, ФОК ден бассейн-влакым ыштыман», - палемден Башкортостанын Вуйлыкшо Радий Хабиров.