Тиде событийлан «Виктория» клубышто шуаралтше самырык-влак кужу жап ямдылалтыныт. Нуно идалык мучко «Десантник» кечывалым пашам ыштыше лагерь пелен ешартыш образованийын педагогшо С. И. Минильбаева дене пырля парашютын устройствыжым да тактико-технический ойыртемжым шымленыт, воздушно-десантный комплексыште самолетышто верланыме радамым, тудын деч ойырлымым, южышто да мландыш волымо годым шкем кузе кучымо радамым лончыленыт. Нунын шонымашышт шукталтын - чыла тунемше парашют дене сайын, нимогай экшык деч посна тӧрштен. Автобусым ойырымыжлан «Путник» рӱдер Мишкан селасе полилингвальный 2-шо школын директоржо С.В. Хазиевлан кугу таум каласа.