Мишкан районысо «Старт» спорт да тазаҥдыме лагерьыште икымше смена 1 гыч 21 июль марте шуйна. Тиде сменыште каратэ дене Башкортостан Республикын сборный командышкыже пурышо шымле йоча кана. Кугурак вожатый Л.М. Аликаеван палемдымыж почеш, ӱдыр-рвезе-влак дене эрдене, кечывалым да кастене Башкортостан Республикысе сборныйын кугурак тренерже А.П. Гурьев, тренер-влак А.О. Богданов да Е.А. Андреев тренировкым эртарат, а кодшо жапыште вожатый-влак дене пырля сӱретлат, творческий кружокышто оригами йӧн дене кагаз гыч модышым, чиян кагаз, шӱртӧ да пӱртӱс пӧлеклыме материал гыч аппликацийым, шер гыч тӱрлӧ арверым ыштылыт, англичан йылме дене почеламутым, мурым тунемыт, йомакым лудыт, мультфильмым ончат, волейбол, футбол, ӱстел теннис, шашке да шахмат дене модыт.
Каныше-влакым кечеш вич гана пукшат. Вожатыйлан студент да кугурак класслаште тунемше ӱдыр-влак тыршат. Самырык каратист-влакын канышышт яндар южышто веселан да пайдалын эрта.