Нефтекамскыште куштылго атлетикын сезонжо почылто

Тений теле деч вара куржталаш лекше-влак 21 апрельыште 4 да 8 километр дистанцийыште вийыштым тергышт, кажныже шке ийготшылан да ӱнаржылан келшыше кужытым ойырен налын.

Таҥасымашке тыгак Янаул да Калтаса районла гыч толшо-влак ыльыч. Организаций да предприятийла гыч тыгай спорт мероприятийыш ушнышо коллектив-влак кажне ийын шагалемыт. Тыште тӱҥ шотышто школышто, колледжыште тунемше-влак кокла гыч ече да куштылго атлетика секцийлаште заниматлыше ӱдыр-эрге-влакым ужаш лиеш. А эше ача-ава-влак шке примерышт дене  икшывыштымат спортлан шӱмаҥдат. Ешге таҥасымашке толшо-влак тыгай годым поснак чолгалыкым ончыктат. Кудыжо куржеш, а кудыжо ӧрдыж гыч «сеҥаш полшынеже». Теве финишыш толын шушаш годым иктаж 10-11 ияш эргылан ачаже кычкыра: «Эрте! Эртен кае ончылнет куржшо рвезым!!!» Йоча, очыни, спорт секцийыш коштеш, молан манаш гын ачаж почеш тудлан умбалнырак эше вес пӧръеҥ, тренерже дыр, кугу йӱкын ешара: «Давай, давай, эрте ончылсо эргым! Ачат «эрте» мане вет!» 

Янаул район Тумна ял гыч таҥасаш толшо Изибаевмытын ешышт гыч 9 ияш Аня ден 11 ияш Софья акаже коктынат икымше верым нальыч. «Ныл километр тылат шуко ыш лий?» - йодым Аня деч куржын толмыж деч вара. «Уке, - воштылал вашештыш изи ӱдыр. - Мый таҥасымаште куд уштышымат куржынам». А ачашт, Герасим Изибаев, шке ийготан пӧръеҥ-влак коклаште кокымшо лие. Аня ден Софья вич ий арняш кум гана Тумна ял гыч Янаулыш куштылго атлетика дене тренировкыш коштыт. Аня 4 ияш, Софья 6 ияш куржталаш тӱҥалыныт. 

Эше ик тыгай оҥай еш - Ипаевмытын. Нефтекамскысе 13-шо школын 11 классыштыже тунемше Алина ече секцийыште заниматла. Куштылго атлетика дене эртарыме таҥасымаш-влакымат ок кодо. Тудо кугурак тунемше-влак коклаште, а тӱҥалтыш класслаште тунемше Милана шӱжарже шке таҥаш изи ӱдыр-влак коклаште сеҥышт. Ты гана авашт пашаште лиймылан кӧра болельщик семын ачашт да Алинан кугурак шӱжарже миеныт ыле. Ӱдыр-влак весела кумылан, мутланаш йӧратыше улыт. «Ачана Бирск ола гыч, авана Мишкан район Тӧргымдӱрыштӧ шочын-кушкын, а ме Нефтекамскысе марий ӱдыр-влак улына!» - мыскара йӧре воштыл каласкален пуышт шкешт нерген.