Нуно ече таҥасымашыште эн писе да тале улмыштым ончыктышт. Николай Гастелло лӱмеш стадионыш Уфимский район гыч инвалид-влакын организацийышт, рӱдола ден Башкортостан Республикысе психоневрологий интернатлаште социальный услугым налше, тыгак коррекционный интернат-школлаште тунемше-влак чумыргеныт ыле.
Тале вий-куатан, сеҥымашыш шуаш тыршышан улмыштлан кӧра Нефтекамск оласе психоневрологий интернатын спортлан шӱман рвезыже-влак таҥасымашыште призовой верлам айлышт. 18 гыч 65 ияш марте ийготан пӧръеҥ-влак коклаште 1 километрыш куржмаште Артур Ясавиев икымше лие, Владимир Бегунов бронза призер радамыш логале. «Соперник-влак виян ыльыч. Сеҥымаш мылам куштылгын ыш пуалт», - ойла Артур. «Призовой верыш шым логал гынат, ом ойгыро, мӧҥгешла, утларак ямдылалташ тӱҥалам», - каласыш Ришат. Рвезе-влак тӱрлӧ спорт таҥасымашлашке молгунамат уло кумылын ушнат. Спорт нунын тазалыкыштым саемда, обществыште шкем ласкан шижаш полша. Ме нунын дене кугешнена да у сеҥымашыш шуаш тыланена!