Чон куржаш ӱжеш

Ты шотышто 16 сентябрьыште Нефтекамскыште эртарыме кроссышто «Искож» АО-н коллектившым сай могырым палемдаш лиеш. Моло дене таҥастарымаште,  спортым йӧратыше пашаеҥже-влак тушечын эн шукын лектыныт ыле.

Куржмо дистанций чылалан икгай лийын - меҥгат пеле кутышан. Тунемше-влакат, кугурак-влакат посна шеледыме иктаҥаш ийготан-влак тӱшка дене таҥасеныт.

Ешге толшо-влакым ончен, пайрем шӱлышым шижат. Теве, мутлан, Ипаевмыт ӱдырышт верч колянен шогат. 11-ше классыште тунемше Алина Ипаева финишыш кокымшо тольо. «Изинек спортым йӧрата, но утларакшым тудо ечызе, телым куржталеш», - палдарыш аваже.

Спорт дене келшыше, куржталаш йӧратыше-влакым чумыр тӱшкаште вигак ойырен палаш лиеш. Нуно моло дечын ятырлан ончыч куржын толыт. Кугурак класслаште тунемше эрге-влак коклаште кудымшо школ гыч (11-ше класс) Вячеслав Ахмадиев сеҥышыш лекте. Тудо икымше класс гычак пятиборье дене заниматла, кроссым куржмаштат молым сайынак ончылтыш.

Колледжыште тунемше студент-влак коклаште таҥасымаш пеш пӱсын эртыш. Чемпион лӱмым сеҥен налшаш верч тыште кок марий рвезылан икте-весышт дене кучедалаш логале. Старт линийыште шогышо-влак гыч Юрий Имановым, машиностроительный колледжын икымше курсшын студентшым, аваже ончыктыш. Эргыжын куржмыжым ончаш аваже дене пырля Юран шӱжаржат миен. Пытартыш кок ий, 10-11 класслаште тунеммыж годым, йолйыжыҥже коршташ тӱҥалмылан рвезе куржталмым чарнен. 

Тений икымше гана таҥасаш лектын. Но кузе! Кудалтыме кок ий пуйто лийынат огыл. Кок тале рвезе дистанций мучко икте-весыж дене кучедале, молышт нунын деке лишемынат ышт керт. Но финишыште Юра икмыняр ошкыллан шеҥгелан кодо. А сеҥышыже кӧ? Коеш, тыглай рвезе огыл, кап-кылже да шогылтмыж гычак пале: тале легкоатлет. Сеҥыше-влакым суапландарыме годым увертарышт: Вячеслав Кугубаев, Нефтяной колледжын икымше курсышто тунемшыже.

- Кушеч тунемаш толынат? Марий улат вет? - йодым сеҥыше рвезе деч.

- Бахтыбай гыч…

- Кужнур гыч огыл мо? - рвезым ӧрыктараш огыл манын воштылальым.

- Да, да… Тушеч… Айгузинын воспитанникше.

Ну, молодец рвезе! Школышто тунеммыж годым Бирск районысо Кужнур ял гыч Мишкан районысо Кугу Соказаш Ю.Б. Айгузин деке тренировкыш коштмыжым, шуаралтмыжым, тренержын пашажым аклен мошта: векат, чыла тиде ушешыже поро кышам коден. Кушеч улмыжым йодмылан вашештымыж годым тренержын лӱмжымат ешараш ок мондо.

Предприятий-влак коклаште таҥасыше ӱдырамаш-влак коклаштат марий чемпион лекте. Тиде - Л.В. Иштубаева (Лиана Илинбаева, Илиш район Анач ялын ӱдыржӧ), 17-ше школышто физкультурым туныкта. А ты школынак вес ӱдырамаш-физрукшо Ангелина Ершова (Калтаса район Калмаш ялын Исакаевмыт тукым гыч) шке ийготанже-влак тӱшкаште сеҥышыш лекте.

Игече сай ыле. Кеҥеж гай. Куван кеҥеж манаш гын, утларак лачеш толеш.

Тыгай годым кузе таҥасымаш пайремыш лекде чытет? Оҥ тич южым поген, шӱлешт-шӱлешт, шке от куржтал гынат, молым ӧрын-куанен ончыметат кумылетым нӧлталаш полша. А вет тидат тазалыклан пайдале…