Все новости
Спорт
24 шорыкйол 2023, 15:19

Шарнымаш ечыгорно. Курык гай куатшым калыклан пуэн

Кульчубай ялыште клуб верланыме урем шеҥгелне кугу курык ош ор гай койын шога. Курыкйолышто, Аптыковмытын пакча мучаштышт, памаш шырчен лектеш.

Авторын фотожо-влак.
Авторын фотожо-влак.

Тиде курык, лум ужга дене леведалтын, кызытсе жаплан келшышын, телым шыпак эртара манаш ок лий: вуйышкыжо шумеш кадыргыл-кудыргыл кӱзышӧ икмыняр кыша коеш, южо вере мунчалтен волашат тӧченыт чай. Тюбинг дене, очыни, тора гыч издер але ече кыша гай ок кой. «Ожно, изина годым, телым чыла йоча тиде курыкышто «почаҥын», такыртен пытарыдыме вержат лийын огыл. Ече, издер, эсогыл таз дене мунчалтенна, кас пычкемыш марте тӱшка йӱк-йӱан курык ӱмбач ала-кушко тораш шумеш шоктен, - шарналтен ойлат пакча шеҥгелсе курыкышт нерген П.Д. Аптыков ден В.М. Андреев. - Ӱлнӧ пилорама верланен ыле, тушко шумеш, эсогыл тудын кӧргышкыжӧ  мунчалтен пурен кайышыжат лийын…»

Ожно… Тидлан ынде пел курым утла эртен. Тунам Леонид Байрамоват, каласкалыше-влакын иктаҥаш йолташышт, нунын дене пырля курыкын куатшым «терген», ече дене мунчалтен, варажым кумдан палыме тале ечызыш, лӱмлӧ тренерыш савырнен. Кульчубай школышто ечызе-влак поҥго гай кушкын шогеныт, Мишкан районышто веле огыл, республикыште да ӧрдыжтат лӱмышт йоҥген. Леонид Анатольевич йоча-влаклан ечыгорным ял покшелнак ыштен, а тудо кугу курык «ончен» шогымо, урем кыдалне верланыше клуб воктенысе алан гыч тӱҥалын… 

21 январьыште тиде алан адакат ечызе-влакын йӱк-йӱанышт дене теме. Ӱмаште Украинысе спецоперацийыште вуйжым пыштыше Марсель Байрамовым шарныме лӱмеш ече дене Мишкан районысо виш таҥасымашыш Нефтекамск, Янаул, Бирск, Дӧртыльӧ олала да Бурай, Бирск районла гыч ечызе-влак миеныт ыле. Ачажын корныжым тошкышо, Леонид Анатольевичын воспитанникше-влак гыч ик эн тале ечызе лийын шогалше эргыжын ӱмыржӧ лугыч лийын гынат, тудо калыкын да шкеж гаяк спортсмен-влакын шарнымашыштышт илаш тӱҥалеш.

Марсельын Бурай ДЮСШ-ште тренерлан ыштыме годсо жапшым шарналтен, тушеч таҥасаш толшо Рафаиль Шарафеев тыге каласыш: «Пеш сай йолташ ыле. Ече дене куржталме техникым сайын тунем шуынам манын шоненам. Но Марсель мыйым эше сайрак йӧным кучылтмо опыт дене палдарыш, туныкташ да полшаш нигунам вуйым шупшын огыл».

Конешне, тыгай рвезым шарныме лӱмеш эртарыме таҥасымашыш кузе от тол? Нефтекамск оласе ече рӱдерын тренер-преподавательже, ече спортын эше СССР годсо мастерже Валерий Гарейшин, вес кечын Чайковскийыш кайышаш лийыныт гынат, Кульчубайыш мийыде кертын огыл. «Мый Леонид Анатольевичым шукертак палем да профессиональный мастарлыкшым кӱкшын аклем, - мане тудо. - Моткоч поро кумылан, виш чонан улеш, икте-весылан полшаш кӱлмӧ годым йодыш лектеш гын, тудо кеч-кунамат кумылым шукта, эре полшаш тырша. Марсель эргыжымат пеш сайын паленам, чолга рвезе да тале спортсмен ыле. Садлан ачажым, тудын поро пашажым, эргыжым ме эре шарнен илышаш улына».

Таҥасымаш Кульчубай уремла дене Марсельын изинек куржталме ечыгорнышто эртыш. Икымше классыште тунемше-влак гыч тӱҥалын, 70 ийым вончышо-влакат (кажныже шке ийготан тӱшкашт дене) таҥасымашке ушнышт. Сеҥымаш верч кучедалмаш куштылго огыл. Но Марсель Байрамовын лӱмжӧ дене кылдалтше ечыгорнышко тудым шарныше, тудын примержым шӱмыштӧ ашныше ечызе-влак лектыныт. Изижге-кугужге. Садлан сеҥалтше лийын огыл…

Мишкан район.

Авторын фотожо-влак. 

Автор:Игорь Губаев
Читайте нас: